Bıyl jazda jyldaǵydaı oblystyń 2264 oqýshysy kıiz úıde demalady. Maýsym-tamyz aılary aralyǵynda Qashyr aýdanynda «Aýyl», Maı aýdanynda «Uly dala eli» jáne Sharbaqty aýdanynda «Ata babalarymyzdyń salt-dástúrleri» ataýlary bar kıiz úı lagerleri jumys isteıdi. О́ńirdegi Pavlodar, Aqsý, Ekibastuz qalalary men aýdandarda 16 lager ashyldy. Aýyldarda ákimdikteriniń qoldaýymen aldaǵy aılarda 28 kıiz úı qurylady. Bul maqsatqa bıýdjetten 2 mıllıon 600 myń teńgeden asa qarajat qarastyrylǵan. Birinshi kezekte áleýmettik jaǵynan álsiz topqa jatatyn otbasylardyń balalary qabyldanady. Kıiz úı lager baǵdarlamasynda oqýshylar qazaq tilin úırenip, salt-dástúrler jáne ádet-ǵuryptarmen tanysady. Kúndelikti ulttyq oıyndar, túrli konkýrstar, vıktorınalar ótkiziledi.
Farıda Byqaı
«Egemen Qazaqstan»
Pavlodar
