Atalmysh shara Halyqaralyq týrızm jyly aıasynda BUU Búkilálemdik týrıstik uıymnyń qoldaýymen ótkizilýde.
Konferensııanyń plenarlyq otyrysyna QR Premer-mınıstriniń birinshi orynbasary Asqar Mámın, «Astana EKSPO-2017» UQ» AQ Basqarma tóraǵasy Ahmetjan Esimov, BTU Bas hatshysy Taleb Rıfaı, QR Mádenıet jáne sport mınıstri Arystanbek Muhamedıuly jáne Astana qalasynyń ákimi Áset Isekeshev qatysty.
2 kúnge jalǵasatyn konferensııanyń jumysynda qatysýshylar kómirsýtek qaldyqtaryn azaıtý, týrızm salasynyń damýy men básekege qabilettiligin arttyrý sııaqty máselerdi, sondaı-aq BUU-nyń kún tártibinde qarastyrylǵan 2030 jylǵa arnalǵan týrızmdi damytýdyń basty tetikterin talqylaıdy.
Qala basshysy Á. Isekeshev óz sózinde atap ótkendeı, shaharda Forward kompanııasymen týrızmdi damytý boıynsha medıa-jospar ázirlengen. Qujatta týrızmdi damytýdyń 3 negizgi baǵyty aıqyndalǵan: MICE (iskerlik) týrızm, qalalyq rekreasıalyq (úzilistik) jáne medısınalyq týrızm.
- 2020 jylǵa qaraı Astana qalasyn Eýrazııa keńistigindegi týrıster úshin eń tartymdy qala etý bizdiń josparymyzda bar. Astana shahary ártúrli forýmdar men sammıt, iskerlik kezdesýler men mádenı-sporttyq sharalardy ótkizetin basty ortalyqtyń birine aınalýy tıis. Bul maqsatta qalada áýejaı, temirjol vokzaly, qonaqúıler men basqa nysandar, biz sózben aıtqanda ınfraqurylym sapaly ári jan-jaqty jetildirilip, damýda, - dedi qala basshysy.
Elordada 10 sporttyq, 20 zamanaýı medısınalyq jáne birqatar biregeı sáýlet nysyndary salynǵan. Bul nysyndardyń jobasyn ázirleýge Norman Foster, Manfredı Nıkolettı syndy álemdik sáýletshiler tartylǵan. Biz sport jáne mádenıet nysyndarynyń kásibı basqarý úlgisin engizýdi qolǵa aldyq. Bul nysyndardy jylyna mıllıondaǵan týrıster baratyn mekenge aınaldyrý qajet.
- Sondyqtan biz elimizge týrısterdi barynsha kóp tartýǵa, sporttyq, mádenı sharalardy kóptep ótkizý úshin atalǵan nysyndardyń kásibı basqarý úlgisin engizýdi qolǵa aldyq, - dedi Á. Isekeshev.
Atap ótken jón, búginde brıtandyq tanymal Telegraf (The Telegraph) basylymynda Astana qalasy týraly maqala jaryq kórgen. Onda elordamyz aldaǵy ýaqytta týrıster úshin eń tartymdy shahar bola alady dep jazylǵan.
