Tanymdy taǵylym

Sol úsh ret aıtqan sózdiń astarynda, birinshisi – qur­saǵyndaǵy nárestesin toǵyz aı, toǵyz kún tirsegi dirildep kó­te­re­tinin, ekinshisi – ashy tol­ǵaq­qa tistenip turyp tózip, ja­nynyń bir bólshegin ómirge áke­letinin, úshinshisi – aq, adal sútin berip, basynan qus ushyrmaı, qus qanatynyń kóleńkesinen de sýyq tıip qalady dep mápelep baǵyp, qatarǵa qosqany jatsa kerek. Qazaq – anasyn ardaqtap, qyzyn jaqsy da qımas qonaǵyna balaǵan jurt. «Ana men ákeniń joly − dara» degen halyq sózi bar.
Alda taratyp aıtqan taǵy­lymdy ónegeni, ıaǵnı qazaqtyń qyzy qandaı bolýy kerek, ananyń urpaq aldyndaǵy úlgisi degen qa­ǵıdany múltiksiz atqaryp kele jat­qan zerdeli zamandasymyz – keshegi «Sosıalıstik Qazaqstan», búgingi «Egemen Qazaqstan» basy­lymynyń qyzmetkeri Nurshagúl Áshimbaıqyzy. 
Qyryq jylǵa taıaý, naqtylaı tússek 22 jasynda kıeli shańy­raq­tyń tabaldyryǵyn attap, qa­zaq jýrnalıstıkasynyń basty ustaha­nasynda nebir nar tul­ǵalardyń tálim-tárbıesin úıren­gen, aldyn qıyp ótpeı, alǵysyn alǵan Nurshagúl bir áńgimesinde óziniń ótken joly jaıly keńinen tolǵanǵany bar edi. 
– Bas basylymda qyzmet etken ardaqty aǵalardyń jóni de, joly da bólek edi. Shetinen aıbyndy, aıbarly, tildese kelgende meıirimderi mol, shapaǵaty eren, qamqor, qaıyrymdy bolatyn. Keýde kermeıtin, men-men demeıtin, kishimen kishi, úlken­men úlkenshe sóılesetin. Ol kezde bas basylymǵa jumysqa turý degen bir mártebe bolatyn. Qa­zaq jýrnalısteriniń qarymdy ókili, belgili jazýshy, romanıst, minezdi de isker, sózinde bere­ke, jumysynda tııanaq bar Bal­ǵabek Qydyrbekuly qyzmetke qabyldap turyp: «Sosıalıstik Qazaqstanda» jumystyń úlken-kishisi joq, bir maqsat, bir múd­de ǵana bar. Isińe muqııat, my­ǵym bol. Saýatty shyqqan gazet – aına. Aınanyń betine daq tússe, dıdaryń kóz tart­paıdy. Sol sekildi gazetten qate ketý, onyń badyraıyp turýy uıatqa qaldyrady, oqyrman aldynda bedelińdi ketiredi. Biz el aldynda, jurt kózinde turǵan basylymbyz», dedi. Balǵabek aǵa aıtqandaı, jaýapkershiligi zor, ózindik qyr-syry bar, kóz ben kóńilińnen ár kúni ondaǵan adamnyń qýanyshy men renishi ótip jatady. Birine «bárekeldi» deseń, ekinshisine et júregiń shymyrlap, keıbir pendelerdiń áttegen-aılaryna nalıtyn tusyń da bolady. Iá, alǵashynda «Qaıda keldim?» dep tolqydym. Jaqsy aǵalar, aıaýly apalar jatyrqamaı, balapandaı baýlydy. Qanatymdy qataıtty. Sóıtip, keshki redaksııadaǵy ju­mys «súıikti» mamandyǵyma aınaldy. Sodan beri osy jumystan qol úzbeı kelemin. Bas basylymda óstim, óndim, budan artyq men úshin baılyq ta, baqyt ta joq, – deıdi kisiligin joǵaltpaı, ki­­shiligin saqtaǵan Nurshagúl Áshimbaıqyzy. 
Ol Jambyl óńirinde Uly Otan soǵysynyń ardageri Áshimbaı men anasy Tursynkúldiń otbasynda dúnıege kelgen tuńǵyshtary eken. Qazaq tuńǵyshy qyz bolsa, ony baılyqtyń kenine, baqyt­tyń basyna balaǵan. Bizdiń keıip­kerimizdiń de ata-anasy sol dás­túrdi esterinde ustapty. Sodan da bolý kerek, onyń artynan Bolat, Bolatbek, Tur­ysbek, Nurjamal, Janar syndy úlbiregen uldary men qyzǵaldaqtaı qos sińlisi ómir esigin ashypty.
 Mektepti bitirgennen keıin S.Kırov atyndaǵy Qazaq mem­lekettik ýnıversıtetiniń jýrna­lıstıka fakýltetine túsip, ony jaqsy bitirgen Nurshagúl ana­synyń ótinishin jerge tastaı almaı, Jambyl oblysy, Merki aýdandyq gazetinde tilshilik qyz­met atqarady. Jas qalamger aýdan ómirindegi eleýli oqıǵalar men keıbir sheshimin tappaǵan olqy­lyqtardy jasyndaı jarqyldap jazyp, jurt kózine túsedi. Bir joly aýdandyq partııa uıymynda alqaly jıyn ótip, olqylyqqa jol bergen keńshar dırektorynyń aty atalyp, qatań eskertý jasalady. Nurshagúl muny qaǵyp alyp, zerttep, zerdeleı kelip, aqı­qatynda minniń bar ekenin anyq­tap shyǵady. Ol gazette ja­rııalanǵannan keıin ujymshar dırektory qyzmetinen alynady. Jas qyzdyń ójettigine rıza bolǵan gazet redaktory Derıdovıch alǵys jarııalap, ózgelerge úlgi etip kórsetedi. Sóıtip júrgende, ózi oqyǵan mekteptiń dırektory muǵalimdik qyzmetke shaqyrady. Ony da abyroımen atqarady. Biraq Almatyǵa barsam, sondaǵy bedeldi basylymdarǵa jumysqa tursam degen arman-tilegi ony alǵa súıreı beredi. Aqyry alda ózi aıtqandaı bas basylymǵa jumysqa turady. 
Qyzmet isteý bar da, aınala­syndaǵy adamdarmen syılas, syrlas bolý da − bir ǵanıbet. Bul turǵydan kelgende Nurshagúl Áshim­baıqyzynyń zamandastarymen ádemi qarym-qatynasy onyń boıyndaǵy izet-ınabatty dáıekteıdi. Mysaly, kýrstas qur­bysy Baıan Bolathanovanyń ol týraly jazbasyndaǵy ádemi sátter onyń bııazylyǵyn kórsetedi. «О́mir­diń eleń-alań belesinde bir­­ge júrgen jan qurbym Nur­shagúl! Nursha – Gúlim!», dep stý­denttik dáýirdegi joǵary kýrs­ta oqıtyn Alma, Aıymhan, ózge de apalary jaıdary minez, qam­qor qareketterin tarata aıtady. 
Elorda Arqa tósindegi Aq­molaǵa kóshkende bas basylym ujy­mynyń beldi ókilderiniń biri retinde kelgen Nurshagúldiń Astananyń órken jaıýy kóz aldynda ótip keledi. Kezindegi bet qaryǵan aıaz, qar úrlegen burqasyn – bári de qazir umyt bolyp barady. Jataǵan úılerdiń ornyna eńseli ǵımarattar boı kóterip, halyqtyń dıdary ashyldy. Esil ózeniniń eki jaǵyndaǵy aqqý tústes eńsesi bıik úıler qazir el maqtanyshyna aınaldy. 
Qazaq baspasóziniń qara shańy­raǵyndaǵy etken eńbek, tókken teri aqtaldy deýge bolady. Onyń eń bastysy ujymǵa syıly, al­dyńǵy tolqyn aǵalaryna – qa­ryndas, apalaryna – sińli, keıingi izbasarlaryna úlgi bolýy, onyń boıyndaǵy qazaq qyzyna tán asyl qasıetterdiń moldyǵynan dep bilemiz. Qurmetke bólenip, abyroıynyń asýyna taǵy bir mysal Elbasynyń Jar­lyǵymen «Eren eńbegi úshin» medalin óńi­rine taǵýy bolsa kerek. Jaı­dary bir sátinde, alty be­leske kó­terilip, mártebesi bıik­tegen áriptes: «Bul kıeli sha­ńyraqqa meniń aldymda da qan­shama úl­kender «pıoner» bolyp kelip, zeınetker bolyp jatty. Munyń ózi basylymdaǵy jarasymdy dástúrdiń, syılastyqtaǵy tynys-tirshiliktiń ádemi dáıegi dep bile­min. Sol jalǵasyn taba berse eken», deıdi. 
Nurshagúl Áshimbaıqyzy qyz­mettegi bedelimen birge otbasyn­da da jigerimen shyńdalyp, as­qarǵa balaǵan Asqar ulynyń súıik­ti anasy bolyp otyr. Kóz qýa­nyshy, úkilegen úmiti Asqar orta mektepti úzdik bitirip, fı­zıka páninen halyqaralyq olım­pıadada júldeger atanyp, sonyń nátıjesinde Almatydaǵy Ha­lyqaralyq aqparattyq tehnologııalar ýnıversıtetin de jaqsy bitirip, Astanaǵa qaıta oralyp, «Qazkontentte» jumys istep júr. Ol anasynyń qolǵanaty ǵana emes, zamanǵa saı bilim alǵan jaqsy maman. Mine, «Egemen Qazaqstan» gazetiniń Nurshagúli ótken jol, qol jetken tabysy osyndaı.

Súleımen MÁMET, 
«Egemen Qazaqstan»