Saltanatty sharaǵa ýnıversıtet rektory, professor Marat Ibatov jáne Mitsubishi Electric konserniniń bas dırektory Hıroshı Fýrýta men «Kazpromavtomatıka» kompanııasynyń ókilderi qatysty.
Qaraǵandy tehnıkalyq ýnıversıteti buǵan deıin de Total, Ersai, Siemens, Festo, Leica Geosystems Kazakhstan, Schneider Electric sııaqty álemdik kompanııalardyń ókildikterimen birlese otyryp, oqý ortalyqtary men tájirıbelik zerthanalar ashqan bolatyn. Mundaı ortalyqtardyń artyqshylyǵy – stýdentter men magıstranttar ýnıversıtet qabyrǵasynda júrip-aq óndiristik tájirıbemen keńinen tanysý múmkindigine ıe bolady.
– Bul zerthanalar ýnıversıtetpen tyǵyz jumys isteıtin metallýrgııa, taý-ken, energetıka salalaryndaǵy óndiris oryndarynyń jumyskerleri úshin trenıngter ótkizýge de óte qolaıly. Sondyqtan, mundaı bilim berý ortalyqtaryn joǵary oqý orny bazasynda óndiristik kompanııalarmen birigip ashý básekege qabiletti shynaıy maman-ınjenerlerdi daıyndap, ólkemizdiń kadrlar máselesin sheshýge tikeleı yqpal etedi, – dedi ýnıversıtet rektory M.Ibatov.
Oqý ortalyǵy Mitsubishi Electric usynǵan álemdik standarttarǵa saı qurylǵylarmen jabdyqtalǵan. Onda óndiristik mashınalardy uzaqtan, tipti, mobıldik telefon arqyly basqarý baǵdarlamalaryn jasaıtyn qurylǵylar, baqylaýshy qurylǵylar, operator paneli, qondyrǵylardyń jumys isteý jıiligin baqylaý quraldary, sondaı-aq jıiligi joǵary toqpen jumys isteıtin óndiristik qurylǵylar men robottardyń jumysyn baqylaý jáne ózgertý prosesterin qadaǵalaıtyn servoprıvod bar.
Ortalyqtyń ashylý rásimine arnaıy shaqyrylǵan japon konserniniń bas dırektory Hıroshı Fýrýta kezdesý barysynda ýnıversıtettegi maman daıarlaý sharttarymen tanysyp, konsernniń resmı ókili «Kazpromavtomatıka» kompanııasy arqyly ýnıversıtetpen úshjaqty seriktestikte jumys jasaýyn jalǵastyra beretindigin málimdedi.
Mıras ASAN,
«Egemen Qazaqstan»
Qaraǵandy oblysy
