Qaıda júrsek te qazaq ónerin dáripteýmen kelemiz

− Qazyken myrza! Qosh kelipsiz, Astanaǵa buryn da jolyńyz túsken shyǵar?

− Iá, men byltyr ǵana kelip ketkem. Halyqaralyq «Shabyt» festıvalinde estrada boıynsha qazylyq jasadym. Shynymdy aıtaıyn, bul jolǵy áser erekshe. Qalaı tez damyp, adam tanymastaı ózgergen?! О́ner saparlarymen Eýropa elderine de kóp shyǵyp turamyn ǵoı, talaı qalalardy kórdik degendeı. Biraq, Astana qalasynyń jóni bólek. Bul qaladan dúnıe júziniń barlyq ǵımarat úlgileri toptastyrylǵan jáne ulttyq naqysh tapqan erekshe úılesimdi kórdim. Muny kórip osy qalanyń Qazaq eliniń qalasy ekenin, qazaq ekenińdi maqtanysh etedi ekensiń. Keshe «Etnoaýyldy» araladyq. О́te jaqsy jasalypty. Týystarǵa kórsetýge nebir tamasha estelikter jıyntyǵyn alyp bara jatyrmyz.

− Sizdi jurt tanymal ánshi re­tinde jáne Qytaıdaǵy qazaq tildi telearnalardaǵy «Qazaqstan daýy­sy» sekildi jobalardan tálimger re­tinde jaqsy tanıdy. О́nerdegi je­tis­tikterińiz týraly qys­qasha aıt­sańyz?

− Men uzaq jyl Beıjiń qalasynda turdym. Oqyǵan mamandyǵym pıanıno edi. Keıin estradaǵa aýystym. Oqýdy bitirip Altaıǵa kelip úsh jyldaı qyzmet ettim de, sodan keıin óz ónerimdi jetildirý úshin qaıtadan Beıjińge kettim. Sonda biraz jigitterdiń basyn qosyp top qurdym. Basynda rok aıtyp, keıin ózimizdiń halyq ánderine oıystyq. О́zim de án shyǵaryp, oryndadym. Nátıjemiz jaman emes, 2000 jyly Qytaıdyń jyl saıynǵy kóktem merekesi qarsańynda ótetin festıvaline qatysyp júldeli boldyq. Shyny kerek, ol baıqaýǵa qatysý múmkindigin alýdyń ózi óte qıyn. Sonymen birge, halyqaralyq festıvaldarǵa jıi baramyz. Azııa boıynsha ótken «Jańa áýen» baıqaýynda úsh atalym boıynsha bas júldeni enshiledik. Mundaı jetistikterimiz az emes. Ispanııa, Fran­sııa, Koreıa syndy kóptegen elderdiń beldi festıvaldarynan júldeli oral­dy. El ishi, syrtyndaǵy ózge de jetistik­terimizdiń bar­lyǵyn mynaý atústi áńgimede keń kólemde aıtyp berý ońaı da emes bolyp tur... Qysqasy, qaıda júrsek te qazaq ónerin dáripteýden tan­ǵan emespiz.

− Qazir nemen aınalysyp júrsiz?

− Men konsertter uıym­dastyrýdan bólek jeke kásippen jáne shákirtter tárbıeleýmen aınalysyp kelemin. О́ıtkeni, talantty jastarymyzdyń joly kesilip jatatyn keleń­siz jaǵ­daılardy kóremin, solardyń óz deń­geıinde óner kórsetýin, qazaq ónerin jalpaq jurtqa pash etýin qaladym.

− Myqty shákirtterińiz bar ma?

− Iá, jańa ǵana aıtqan «Sha­byt» halyqaralyq fes­tıvalinde Qaı­sar Dalaı degen ánshi baýyrymyz «Estrada» janry boıynsha bas júldeni qanjyǵalap qaıtty. Sámet, Serjan, Ádil syndy jas pe­riler endi jarqyrap kórinip júr. Osy jaqtaǵy «Qazaqstan daýysy» syndy «Kúmis kómeı» án baıqaýynda eki shákirtim birinshi, ekinshi oryndardan kórindi. 

− Quryltaı jóninde aıtsańyz. Sizdiń óz salańyzǵa qandaı áseri bar?

− Jalpy, qazaqqa paıdasyn tıgizer qandaı da bir joba bizdiń de paıdamyz dep esepteımin. Quryltaı óte tamasha ótti. Elbasy Nursultan Nazarbaev qazaq jastarynyń shyǵarmashylyq baılanystary jóninde aıtty. Sonyń ishinde ózge elderdegi ónerpaz jas­tar Qazaqstanǵa kelip konsertter qoıyp, túrli sharalar men ózara mádenıetti baıytý jóninde aıtty. О́te quptarlyq sóz. Shynymdy aıtsam, endi osyndaǵy dostarym bar, eki eldiń mádenıet almasý boıynsha arnaıy oryndarymen selbesip ónerimizdi atajurtta da kórsetsek degen oı kelip otyr. Osynda Erlan Kókeev syndy áriptes dostarym bar ǵoı, solarmen de aqyldasyp bul oıdy iske asyrýǵa tyrysamyn.

− Sáttilik tileımiz. Bir aýyz tile­gińiz...

− Tilegim, eki el arasy máń­gi tynysh, yntymaqty bolsa eken. Eki el basshylarynyń dostyǵy máńgi jarasa berse. Qytaıda bir jarym mıllıon qazaq bar dep jatamyz, solardyń da tileıtini eki el aman bolsa, dostyǵy berik, qatarlasa qarqyndy damysa dep tileıdi. Láıim solaı bola bersin. 

Áńgimelesken 
Ularbek NURǴALYMULY, 
«Egemen Qazaqstan»