Búgin Batys Qazaqstan oblystyq máslıhat zalynda ótken saılaý naýqanyna oblystaǵy aýdandyq, qalalyq jáne oblystyq depýtattar túgelge jýyq qatysty.
Batys Qazaqstan oblystyq saılaý komıssııasynyń tóraǵasy Ǵaısa Qapaqovtyń aıtýynsha, barlyq 198 depýtattyń 194-i saılaýǵa qatysyp, daýys bergen. Senat depýtattyǵyna kandıdat – Qurmanǵazy atyndaǵy Oral mýzyka kolledjiniń dırektory, qalalyq máslıhat depýtaty Nurjan Sertekov – 38 daýys, Oral qalasynyń ákimi Narıman Tóreǵalıev – 156 daýys alǵan.
Senat depýtattyǵyna áý basta úsh depýtat usynylǵan bolatyn. Biraq «Avtokombınat» JShS dırektory Valerıı Goloýhov óz ótinishimen saılaý dodasynan kandıdatýrasyn alyp tastady.
Narıman Tóreǵalıev 1964 jyly sol kezdegi Oral oblysy Taıpaq aýdany Esensaı aýylynda dúnıege kelgen. Bilimi joǵary, 1990 jyly Jambyl gıdromelıoratıvtik qurylys ııstıtýtyn, 2004 jyly Qazaq qoǵamdyq ýnıversıtetin támamdaǵan. Mamandyǵy - ınjener-ekonomıst, zańger.
Eńbek jolyn Aqjaıyq aýdanyndaǵy «Esensaı» keńsharynda 1981 jyly jumysshy bolyp bastaǵan N.Tóreǵalıev oblystyń Terekti aýdanyna qarasty óndiristik koopratıvinde bas esepshi, bas ekonomıst qyzmetterin atqarǵan. 2002-2003 jyldary jalpy úlgidegi Oral ınternat úıiniń dırektory, 2003-2005 jyldary Batys Qazaqstan oblysynyń eńbek, jumyspen qamtý jáne halyqty áleýmettik qorǵaý basqarmasy bastyǵynyń orynbasary, 2008 jyldary Batys Qazaqstan oblysynyń eńbek, jumyspen qamtý jáne áleýmettik baǵdarlamalardy úılestirý departamenti dırektorynyń orynbasary, 2008-2010 jyldary QR Tabıǵı monopolııalardy retteý agenttiginiń Batys Qazaqstan oblysy boıynsha departamentiniń dırektory, 2010-2012 jyldary Batys Qazaqstan oblystyq jumyspen qamtýdy úılestirý jáne áleýmettik baǵdarlamalar basqarmasynyń bastyǵy, 2012-2015 jyldary BQO Aqjaıyq aýdanynyń ákimi, 2015-2016 jyldary Batys Qazaqstan oblysy ákiminiń orynbasary, 2016 jyldyń 5 sáýirinen bastap Oral qalasynyń ákimi bolyp qyzmet etti.
Qazbek QUTTYMURATULY,
"Egemen Qazaqstan"
ORAL
