Naqtylaı aıtsaq, 19-25 maýsym aralyǵynda qalashyqqa 168 675 adam at izin salǵan. Iаǵnı, kórmeni kúnine ortasha eseppen 24 069 adam aralaǵan. Bastapqy 9 kúnde 205 561 adam nemese kúnine 22 840 kelýshi tirkelse, bul kórsetkish 27 maýsymdaǵy jaǵdaı boıynsha 425 377 kórermenge kóbeıdi. Sonymen qatar, «Astana EKSPO-2017» UK» AQ baspasóz qyzmetiniń málimetinshe, 10-27 maýsymda kórmege kelip-ketý kórsetkishi 2 774 527-ni quraǵan.
Halyqaralyq sharaǵa qatysty taǵy jańalyq, qonaqtar sany joǵary pavılondardyń úzdik ondyǵynyń tizimi jasaldy. Olardyń arasynda Reseı, О́zbekstan, Úndistan, Ázerbaıjan, Afrıka elderi, Mysyr, Qytaı, Túrkııa, Saýd Arabııa Koroldigi, Malaızııa bar. Munymen qosa, adamdar kóptep tamashalaıtyn nysandardyń ishinde «Nur álem», kommersııalyq pavılondary, «Shell» balalar zerthanasy, «Dıý Soleı» sırki, «S 3.5», «S 2.4» taqyryptyq pavılondary, amfıteatr, shyǵarmashylyq energııa aımaǵy, korporatıvtik pavılon, balalar saıabaǵy qamtylǵan.
Kórme bastalǵaly beri qaýipsizdik máselesi boıynsha 178 oqıǵa tirkelgen. Olardyń basym bóligi – eresekterdiń balalardan kóz jazyp qalýy. Aıta keterligi, kún ótý, álsireý, sondaı-aq sozylmaly aýrýlary bar jandar tarapynan medısınalyq kómekke júgingender sany 146-ǵa jetti.
«Astana EKSPO-2017» ulttyq kompanııasy arzan bıletterdi satylymǵa shyǵarǵanyn habarlady. Ol bılettermen keshki saǵat 18:30-dan bastap kirýge bolady eken. Jumys kúnderi «keshki» bılettiń baǵasy 2 myń teńge bolsa, demalys kúnderi 3 myń teńgeden satylady. Al áleýmettik jaǵynan az qamtylǵan azamattar úshin odan eki ese arzan bolady. Demek, olar keshki bıletterdi 1-1,5 myń teńgege ala alady.
EKSPO kórmesine abonement te satyp alýǵa bolady. 50000 teńgeniń abonementimen kórme aıaqtalǵansha kirip-shyǵýǵa múmkindik bar. Áleýmettik jaǵynan az qamtylǵan azamattar úshin ondaı abonementtiń baǵasy eki ese arzanǵa túsedi, ıaǵnı 25000 teńge bolady. Aıta keterligi, abonementter naqty adamnyń atyna jazylady. Sol sebepti, tekserýshiler ondaǵy málimetterdi jeke kýálikpen salystyryp kirgizedi.
Ashat Raıqul,
«Egemen Qazaqstan»
