Týrnırdiń ekinshi kúninde atlet 200 metrge jarysyp, márege 23,01 sekýndta jetti. Osydan keıin Vıktorııamen az-kem suhbattasyp, memorıal jaıly, aldaǵy Azııa chempıonaty týraly suraǵan edik.
– Osy joly memorıal keremet ótti. Uıymdastyrýshylarǵa alǵys bildiremin. Federasııanyń jańa basshylyǵy, pıar-bólimi barlyǵy keremet jumys istegeni kórinip tur. Osylaı-osylaı álemdik deńgeıdegi jarystardy joǵary deńgeıde ótkizýge mashyqtanyp ketemiz dep oılaımyn.
– Jarystyń ekinshi kúninde jańbyrdyń quıyp turǵanyna qaramastan 200 metrge júgirip, jeńiske jettińiz.
– 100 metrde jeńiske jetkennen keıin ekinshi kúni eshqandaı qysymsyz erkin túrde júgirip óttim. Áriptesim Olga Safronovanyń álem chempıonatynyń normatıvin oryndaǵanyn qatty qalaǵan edim. Olgaǵa kómektesýdi oıladym. О́kinishke qaraı, sál ǵana sekýndtar jetpeı qaldy. Qudaı qalasa, Azııa chempıonatynda joldamaǵa qol jetkizedi dep senim artamyn. Azııanyń eki úzdik sprınteri mindetti túrde álem chempıonatyna barýy tıis. Al aýa raıynyń qolaısyzdyǵyna kelsek, sportshynyń qulshynysyna jańbyr kedergi bola almaıdy. Sportshy barlyǵyna daıyn bolsa, kózdegen maqsatyna qol jetkizedi.
– 6-9 shilde kúnderi Úndistannyń Bhýbaneshvar qalasynda Azııa chempıonaty ótedi. Aldyńyzǵa qandaı maqsat qoıyp otyrsyz?
– Birinshi kezekte 100 metrge júgirýden Londondaǵy álem chempıonatynyń normatıvin oryndaýdy kózdep otyrmyn. Sondaı-aq, múmkindiginshe, ózim qatysqan saıystyń barlyǵynda jeńiske jetkim keledi.
– Buǵan deıin Úndistanda jarysqa qatysyp kórdińiz be? Ol jaqtyń klımatyna daıyndyǵyńyz qandaı?
– Men 2013 jyly Azııa chempıonatyna qatysqanmyn. Sol kezde de Azııa chempıonaty Úndistanda ótken. Klımat, aýa raıy problema emes. Men úshin eń qıyny – sý men tamaq. Biraq eshteńe etpeıdi, ózimizben birge qazy-qarta alyp baramyz. Barlyǵy jaqsy bolady dep oılaımyn (kúldi).
Bek TО́LEÝOV,
jýrnalıst
ASTANA
