Báseke belesi

Keshe 1/8 fınalda túske deıin eki boksshymyz qolǵap túıistirdi. Bireýi – 64 kılo sal­maqta Danııar Eleýsinov, ekinshisi – 81 kıloda Ádilbek Nııa­zymbetov, úshinshisi – 75 kılo­daǵy Danabek Sýjanov. Osy boksshylarymyzdyń ishinen soń­ǵy ekeýi Olımpıadaǵa joldama aldy. Al bizdiń birinshi kezdesýimiz ókinishke qaraı, sát­siz ótti. Danııar Eleýsinov majar boks­shysy Gıýla Keıtten jeńilip qaldy. Kezdesýde majar 17:11 esebimen je­ńis­ke jetti. Da­nııardyń qarsy­lasy 2009 jylǵy álem chempıo­na­ty­nyń qola júl­de­geri. Buǵan deıin onyń 2009 jyly Mılanda Rýstam Sybaıdy, byltyr Antalııada ótken halyqaralyq jarys­ta Ádilbek Elgezekovty ut­qan edi. Endi, mine majar álem chem­pıonatyna alǵash ret qatysqan boks­shymyzdan aıla­syn asyryp ketti. Bul boksshynyń básekede kem degende taǵy da qo­la medaldi je­ńip alý­ǵa múm­kin­digi bar. Al Danııar bol­sa, jekpe-jegine taǵy da qyzýy kóterilip shyqqa­nyn aıtty. Kezdesýden keıin: «Men qoldan kel­genniń bárin jasa­dym. Múmkin den­saý­lyǵym da je­ńý­ge múmkindik ber­megen shyǵar», – dedi ol. Qalaı degende de majar boksshysynyń jaqsy kezdesý ótkizgenin moıyndaý kerek. Muny bizdiń bas bapker Aıtjanov ta moıyndap otyr. «Kezdesýde jeńilgeni kórinip turdy ǵoı. Endi kelesi jyly sáýirde Astanada ótetin lısenzııalyq jarysqa daıyndalý kerek. Danııar sol jerde joldama alady. Ol Londonǵa barý kerek», degen pikirin aıtty. Keshe Eleýsinovtiń kezdesýinen keıin 81 kıloda Ádilbek Nııazymbetov ulttyq quramaǵa álem chempıonatyndaǵy alǵash­qy lısenzııany syıǵa tartty. Kolýmbııalyq Djeıson Monroımen kezdesýde Ádilbek ekinshi raýndtyń 2 mınóti 20 se­kóntinde qarsylasyn oń qolmen nokaýtqa jiberdi. Osy kezde kolýmbııalyq rıngte bir mınót­teı jatyp, ornynan tura alma­dy. Bárimizdiń janarymyz shar­shy alańda. Nııazymbetov qar­sy­lasyn nokaýtqa uryp, qula­typ­ty. Tóreshiler ádil ba­ǵa­syn berdi. Nokaýt esepteldi. Bakýdegi boks keshinde 75 kılo salmaqtaǵy kezdesýde bizdiń quramaǵa Danabek Sýjanov joldama alyp berdi. Ol AQSh ókili Djessı Hartty jeńdi.Bul kezdesýde oǵan aldyńǵy eki jekpe-jek sııaqty ońaı bolmaǵanyn aıtý kerek. Degenmen ekinshi raýndtan keıin esep 9:9 bolǵand boksshymyz namysqa tyrysyp, jeńiske jetti. Esep – 17:15. Endi ol shırek fınalda brazılııa­lyq Eskıýva Falkaomen kezdesedi. Álem chempıonatyna Eleýsinov, Nııazymbetov sııaqty alǵash ret qatysyp jatqan boksshymyzǵa sáttilik tileımiz. Odan keıin basqa salmaqtarda Serik Sápıev (69 kılo), Ǵanı Jaılaýov (60 kılo), Vasılıı Levıt (91 kılo) pen asa aýyr salmaqtaǵy Ivan Dychko qolǵap túıistirdi. Olardyń kezdesýleri keshki baǵdarlamada ótkendikten bul reportajǵa kirgizýge úlgere almadyq. Dastan KENJALIN – Bakýden.