Eń aldymen aımaq basshysy «ERNUR» korporasııasynyń baspahanasynda bolyp, onyń jumysyn kórdi. Bul mekeme – baspa isimen qatar baspa ónimderin satý jáne taratýmen, tanymdyq baǵyttaǵy gazet-jýrnaldar shyǵarýmen aınalysady.
«ERNUR» korporasııasyna qarasty baspahanada búgingi tańda 80 gazet-jýrnal basylady. Olardyń qatarynda respýblıkalyq «Egemen Qazaqstan», «Kazahstanskaıa pravda», «Vremıa, syndy bedeldi basylymdardyń Ońtústik aımaǵyna taraıtyn taralym men respýblıka kólemine taraıtyn jergilikti basylymdar da basyp shyǵarylady. Iаǵnı, baspa stanogy bir aıda 4 mıllıonǵa jýyq taralymdy basyp shyǵarady. 450-den astam adam jumyspen qamtylǵan baspahanada joǵary tehnologııaly stanoktar ornatylǵan.
Baspahanany aralap kórgen ákim medıanaryqtaǵy básekege laıyqty jumys isteý ómir talaby ekenin aıtyp, jumystaryna sáttilik tiledi.
Munan bólek, ákim óńirdegi «Ońtústik Qazaqstan», «Iýjnyı Kazahstan», «Janýbıı Qozoǵıston» gazetteri redaksııalarynyń jumysymen tanysyp, jýrnalıstermen tildesti.
Shyǵarmashylyq ujymmen bolǵan júzdesýde ákim basylym - memleketimizdiń tynys-tirshiligi men aınasy ekenin aıtyp, Elbasynyń saıasaty men «Bolashaqqa baǵdar:rýhanı jańǵyrý» baǵdarlamalyq maqalasynyń oblysta keń kólemde nasıhattalýyna úles qosqandary úshin alǵysyn bildirdi.
«Elbasymyz Nursultan Ábishuly Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda jýrnalısterdiń egemendiktiń eleń-alańynan beri qozǵap júrgen memleketimizdiń bolashaǵy úshin barlyq mańyzdy taqyryptarǵa erekshe mán bergenin kórdińizder. Rýhanı jańǵyrý, ulttyq jańarý syndy aýqymdy jumystardy atqarýda sizderdiń eńbekterińiz ben kómekterińiz aýadaı qajet. Buqaralyq aqparat quraldary zamanaýı damý úderisterine saı qalyptasý kerek. Ol úshin iri medıaholdıng aıasyna toptasyp, aqparattyq báseke barysynda jańasha úlgide jumys isteýge kóshkenimiz abzal bolar»,- dedi ákim.
О́ńirdiń ıntelegensııasynyń ósip, órkendeýine mol úles qosyp kele jatqan ujymdarǵa qoldaý kómek kórsetý qajettigin aıtqan aımaq basshysy memlekettik úsh gazettiń ǵımaratyna kúrdeli jóndeý jumysyn júrgizýge tapsyrma beretinin aıtty. Sonymen qatar, medıasaladaǵy tyń jańalyqtardan kósh qalmaı, suranysqa qaraı jumys jasaýdy jáne ınternettik jýrnalıstıkany da qolǵa alýdy atap ótti.
Sapary barysynda oblys ákimi 25 jyldyq tarıhy bar «Otyrar» telearnasynda boldy. Onda «Sobkor» jaýapkershiligi shekteýli seriktestiginiń basshysy Kýlıkova Valentına «Rabat», «Ońtústik Rabat» gazetteri men telearna jumysyn tanystyrdy. Sondaı-aq, ol búginge deıin jetken jetistikterin baıan etti.
Osy rette, ákim jańalyqtyń jarshysy bolyp júrgen telearna ujymyna alǵysyn bildirip, olarǵa jańa ıdeıalar men jobalardy júzege asyrýda tabysqa jete berýlerin tiledi.
Osy kúni óńir basshysy 28 maýsym – Qazaqstan Respýblıkasy Baılanys jáne aqparat qyzmetkerleri kúnine oraı uıymdastyrylǵan merekelik sharaǵa qatysyp, aqparat salasy qyzmetkerleriniń kásibı merekesimen quttyqtady.
Merekelik sharada J.Túımebaev Ońtústiktiń qoǵamdyq-saıası, áleýmettik-ekonomıkalyq, mádenı ómirindegi jetistikterin nasıhattaýǵa jáne oblys turǵyndarynyń birligin nyǵaıtýǵa qosqan úlesi úshin birqatar jýrnalısterdi marapattap, tájirıbe almasý maqsatynda Túrkııa eline óńirdegi bas redaktorlarmen menshikti tilshilerge jalpy sany 20 adamǵa joldama berdi.
Aıta keteıik, Ońtústik Qazaqstan oblysynda búginde jumys júrgizip jatqan buqaralyq aqparat quraldarynyń sany 258-ge jetip otyr.
