Konferensııaǵa elimizdiń Syrtqy ister mınıstri Qaırat Ábdirahmanov, QR Prezıdentiniń halyqaralyq máseleler jónindegi kómekshisi Nurlan Onjanov, Parlament Májilisiniń Halyqaralyq ister, qorǵanys jáne qaýipsizdik jónindegi komıtettiń tóraǵasy Máýlen Áshimbaev, «Astana EKSPO-2017» ulttyq kompanııasy AQ basqarma tóraǵasy Ahmetjan Esimov, elimizdegi shet memleketterdiń qazirgi jáne burynǵy elshileri qatysty.
Jıyndy júrgizgen Syrtqy ister mınıstri Qaırat Ábdiraxmanov kópshilik nazaryna Qazaqstan Respýblıkasy dıplomatııalyq qyzmetiniń 25 jyldyǵyna arnalǵan beınebaıandy usyndy. Bul beınebaıanda Qazaqstannyń syrtqy saıasatynyń basty kezeńderi, onyń damý joldary álemniń alpaýyt elderimen áriptestik qarym-qatynas ornatýy, Elbasynyń Semeı polıgonyn jaýyp, ıadrolyq qarýdan bas tartqany kórsetildi.
Alqaly jıyndy Elbasy kitapxanasy Syrtqy ister mınıstrligimen, QR Tuńǵysh Prezıdenti - Elbasy qory, Qor janyndaǵy Álemdik ekonomıka jáne saıasat ınstıtýty birlese uıymdastyryp otyr. Jıynda sóz alǵan Benılıýks elderiniń burynǵy Tótenshe jáne ókiletti elshisi bolǵan, búginde «Astana EKSPO-2017» ulttyq kompanııasy AQ basqarma tóraǵasy Ahmetjan Esimov ótken kúnderi jaıly oı bólisti. Eýroodaqta, jáne NATO-da turaqty ókili qyzmetin atqaryp. Qazaqstan Eýroodaq birlesken komıssııasynyń tóraǵasy bolǵanyn aıta kelip, osy ýaqyt aralyǵynda jınaǵan tájirıbesin qazirgi qyzmetinde de paıdalanyp júrgenin málimdedi.
"Elimiz kópvektorly saıasatynyń arqasynda syrtqy saıasat nátıjesinde óz shekaramyzdy aıqyndadyq, ekonomıkamyzdy damyttyq, xalyqaralyq prosesterge qatysý barysynda Qazaqstannyń ashyq jáne beıbitsúıgish memleket retinde tanytyp keledi. Osy jumysta dıplomattarymyz úlken septigin tıgizgeni anyq", dedi Axmetjan Esimov.
Shara barysynda sóz alǵan QR Tuńǵysh Prezıdenti - Elbasy kitapxanasynyń orynbasary Ámirxan Raxymjanov 25 jyl ishinde Memleket basshysy túrli deńgeıdegi minberlerden kóptegen ıdeıalaryn usynǵany, onyń barlyǵy derlik qoldaý taýyp, damý ústinde ekenin aıtty.
"Qazaqstan kóshbasshylyǵynyń ereksheligi álemdik syn-qaterlerdiń sheshimin izdestirýde, sondaı-aq jahandyq yntymaqtastyqtyń jańa úlgilerin damytýda aıqyn baıqalady. Ǵalamdyq jáne óńirlik qaýipsizdikti nyǵaıtýǵa baǵyttalǵan tabysty suxbat alańdary osy oıymnyń bir dáleli", dedi Ámirxan Raxymjanov.
Sonymen qatar, shara barysynda Elbasy Nursultan Nazarbaevtyń Sırııadaǵy qandy shabýyldy retteý joldaryn izdeýge arnalǵan belsendi áreketteri, onyń 2015-2016 jyldary Reseı men Túrkııa arasyndaǵy keleńsizdikterdi sheshýdegi mańyzdy róli jaıly Nurlan Ojanovtyń «Bitimger: Sırııa túıini» atty kitabynyń tusaýkeser rásimi ótti. Kitapta 2011 jyldan bastalǵan búginge deıingi Sırııanyń axýaly jazylǵan. Bul kitap osyndaı daǵdarystarǵa ózindik bir úndeý bolyp esepteledi. Sonymen qatar, kitapta Memleket basshysynyń Islam áleminiń odan ári damýy týraly da pikirleri keltirilgen.
"Elbasymyzǵa Táýelsizdiktiń alǵashqy jyldarynan bastap bitimgershilik jóninde ótinishter kóptep túsken. Memleket basshysynyń bitimgerlik bastamalary árqashan nátıjeli boldy. Máselen, Taýly Qarabax Qyrǵyzstandaǵy 2005-2010 jyldary jaǵdaıdy turaqtandyrýǵa úlken úlesin qosty. Osyǵan baılanysty Qazaqstan BUU-nyń turaqty emes keńesiniń múshesi bolyp saılandy", dedi Nurlan Onjanov.
Aıan Ábdýálı,
"Egemen Qazaqstan"
