Saltanatty sharaǵa oblys ákimi J.Túımebaev qatysyp, joǵarǵy oqý ornyn sátti bitirgen túlekterdi quttyqtap, jas maman ıelerine aldaǵy qadamdaryna tabys tiledi.
«Búgin Sizder úshin erekshe kún. Sebebi belgili bir maman ıesi atanyp, úlken ómirge qadam bastyńyzdar. Qazaqstannyń qazirgi bilim berý júıesi ulttyq tarıhymyz ben jahandanýdyń, izdenis pen kúrestiń keńistigi bolyp tur. Elbasy Nursultan Nazarbaev «Bolashaqqa baǵdar: rýhanı jańǵyrý» maqalasynda: «Tabysty bolýdyń eń irgeli, basty faktory - bilim» ekenin aıryqsha atap ótti. Ońtústik bilim, ǵylym, ınnovasııalyq damýlarda kósh bastap kele jatqan óńir. Sondyqtan bitirýshi túlekterdi jumys ornymen qamtamasyz etýde oblysqa ınvestısııalar tartýdy basty mindet etip qoıdym»,-dedi ákim.
Búgingi merekelik sharada ýnıversıtettiń 4 myńǵa jýyq stýdenti 86 mamandyq boıynsha oqýdy aıaqtap dıplom alsa, onyń 580 túlegi qyzyl dıplom ıelendi.
75 jyldyq tarıhy bar M.Áýezov atyndaǵy Ońtústik Qazaqstan memlekettik ýnıversıtet bıyl tolaǵaı tabystarǵa qol jetkizdi.Atap aıtar bolsaq, Qazaqstandaǵy joǵary oqý oryndarynyń reıtıngisinde III-oryndy ıelense, QS (kıýes) reıtıngisi boıynsha álemdegi 4,5 myń joǵary oqý oryndarynyń ishinde 609-dan 501-shi orynǵa kóterildi.Oqý ornyndaǵy 16 myńnan astam stýdentke 1500-den astam professor-oqytýshy, onyń ishinde 23-i akademık, 650-den astamy ǵylym kandıdattary, 170-ke jýyq ǵylym doktory sapaly bilim berýde.Jyl saıyn 700-ge jýyq stýdent pen 150-den astam oqytýshy Akademııalyq utqyrlyq baǵdarlamasy boıynsha sheteldik tanymal joǵary oqý oryndarynda bilimderin jetildirýde.
Aıta keteıik, búgingi tańda óńirdegi 12 joǵary oqý oryndarynda 70 myńǵa jýyq jas bilim alýda. 2017 jyly 11 myńnan astam túlek oqýyn bitirip shyǵyp, dıplomdaryn qolyna alyp otyr.
