Kishkentaı sábıdiń úlken qýanysh ákeletini álmısaqtan belgili ǵoı. Al Astanany mıllıoner qala degen mártebeli mejege jetkizgen shaqalaq alty Alashtyń balasynyń bórkin aspanǵa atqyzyp, qýanyshqa keneltti. Aqyndar jyrdan shashý shashty, ákimder syı-sııapatyn usyndy. Memleket basshysy N.Nazarbaev elorda toıynyń bastalǵanyn pash etetin Memlekettik týdy kóterý saltanatynda sóz sóılep, halyqtan súıinshi surady, aq tilegin jetkizdi.
Saryarqanyń salqar tósinde dúnıege kelgen sábıdiń esimi – Saıda. «Saıda» – arab tilinen aýdarǵanda «baqytty» degen maǵynany bildiredi. Ata-anasynyń kózin ashyp kórgen tuńǵyshy. Ákesi Oljas Muhamedıarov − elordany elektrmen qamtýshy «Astana-REK» kásipornynda energetık. Anasy Araılym bolsa «Nurshashý» balabaqshasyndaǵy jumysynan ýaqytsha qol úzip, Saıdany baǵyp-qaǵýmen aınalysýda. Erli-zaıyptylar Astanada tanysqan, Astanada tabysqan, osynda shańyraq kótergen. Búginde jigittiń áke-sheshesimen birge turady.
Astananyń ákimi Áset Isekeshevke rahmet, kisiligi mol kósheli azamat ekenin aıqyn kórsetti. Mıllıonynshy turǵyn dúnıe esigin ashatyn sátti tosyp, tún uıqysyn bólgen ákim kishkentaı Saıdanyń kindigi kesilgen túni tań azanmen baqytty ata-anany quttyqtap, eki bólmeli páterdiń kiltin óz qolymen tapsyrǵan-dy. Kúlsheli kishkentaı qazir sol quthanada ósip jatyr.
Byltyr bolǵan qýanyshty oqıǵany bıyl qaıta qozǵap otyrǵanymyz beker emes. Astananyń mıllıonynshy turǵyny bir jasqa qadam basqan tusta habarlasyp, jaı-kúıin bilip, eldiń atynan, el gazeti – «Egemenniń» atynan quttyqtaǵandy jón kórgen edik.
– Saıdanyń týǵan kúni qutty bolsyn! Týǵan sátinen bastap eldiń balasyna aınalǵan kishkentaıdy quttyqtaıyq dep arnaıy habarlasyp turmyz!
– Kóp rahmet sizderge! Byltyr quttyqtaǵan buqaralyq aqparat quraldarynyń arasynan birinshi bolyp «Egemen Qazaqstan» habarlasty,– degen anasy Araılym qýanyp qaldy.
Anasynyń aıtýynsha, Saıdanyń densaýlyǵy jaqsy, tártibi túzý. Qatarlastarynan qalmaı ósip keledi. Tek ata-ájesiniń súıikti nemeresi bolǵan soń erkeligi basymdaý kórinedi. Balalarymen birge turatyn qarııalar nemerelerin betinen qaqpaı, emin-erkin baǵyp-qaǵyp jatyr eken.
Sábıi dúnıege kelgennen keıin erli-zaıyptylar eldegi medıa-tulǵalarǵa aınalyp kete jazdaǵanyn aıtyp kúledi. Sodan keıin birneshe aı boıy jýrnalıster jıi habarlasypty, respýblıkalyq arnalardaǵy tok-shoýlar men basqa da baǵdarlamalardyń keıipkerine aınalypty. Bul úrdis birneshe aıdan keıin ǵana tolastaǵan eken.
– Bul − kishkentaıymyzdyń nesibesi, Allanyń bizge buıyrtqan baqyty dep bilemiz. Bir-aq kúnde elge áıgili bolyp ketemiz dep kim oılaǵan?! Dál qazirgideı esimizde. Áıelimdi tolǵaq qysyp, perzenthanaǵa aparǵanda, eń aldymen aman-esen aıaq-qolyn baýyryna alýyn tiledim. Basqa oı múlde bolǵan joq. Qarapaıym qazaqstandyqtarǵa jaıly ómir súrýge jaǵdaı jasaǵan Prezıdentimizge alǵysymyz sheksiz! Qala basshylyǵynyń qamqorlyǵyna kóp rahmet!– deıdi ákesi Oljas Muhamedıarov.
Saryarqanyń saýyrynda qazyǵy qaǵylyp, keregesi kerilgen Astananyń mıllıoner qala atanyp, megapolıske aınalǵanyna da bir jyl zaýlap óte shyǵypty. Álemde mıllıoner qala kóp bolǵanymen, Qazaqstan úshin kóp emes, bir qoldyń saýsaǵyna da tolmaıdy. Almatydan keıin resmı moıyndalǵany osy Astana boldy. Shymkent te tirkelgen turǵyndardyń sany boıynsha mıllıonerlerdiń sanatyna qosylyp, úshtikti túıindep tur.
Bolar eldiń basty baılyǵy – adamı kapıtaly ekenin damyǵan elder áldeqashan dáleldegen. Adamı kapıtalyn damytqan, halqyna jan-jaqty jaǵdaı jasaǵan eldiń ǵana kósegesi kógerip, kósh bastaıtynyn kózimiz kórip otyr. Sannan sapa týatynyn eskersek, attóbelindeı qazaqtyń qarasyn kóbeıtý búgingi kúnniń basty murattarynyń biri bolýy haq! Astananyń mıllıonynshy azamaty, kishkentaı Saıdany basylymnyń atynan bir jasymen quttyqtaýdaǵy bir maqsatymyz osy boldy!
«Saıda» esimi «baqytty» degen maǵynany bildiretinin sóz basynda aıtyp óttik. Olaı bolsa, bas qalanyń mıllıonynshy turǵyny atyna zaty saı bolyp, baqytty eldiń basty ordasynyń baqytty azamattarynyń biri bolyp óssin! Bizdiń tilek osy!
Arnur Asqar,
«Egemen Qazaqstan»
