Ulttyq kún aıasynda EKSPO qonaqtarynyń nazaryna taı mádenıetin jáne onyń turmys saltyn beıneleıtin áserli shoý usynyldy. Kórermender «Hon», «Kınnarı», «Ramaıana maskalar» ulttyq bılerin jáne Djo Lýıs qýyrshaqtarynyń qoıylymyn tamashalady. Shoý barysynda 2016 jylǵy Taıland vıse-mısi Pınthıp «Kvan» Orakhorn hanym jınalǵan jurtty óz eliniń bıine úıretti. Ol, ásirese, ónerimen ári sulýlyǵymen kópshilikti tánti etti. Budan bólek, qonaqtarǵa taı eliniń balamaly energetıka salasyndaǵy jetistikteri, aýyl sharýashylyǵynda bıoenergetıka óndirý tehnologııalary arnaıy beınebaıandar arqyly kórsetildi.
Merekeniń resmı bóliminde Taılandtyń Energetıka mınıstri Anantaporn Kandjanarat balamaly energııa alý jolynda aýyl sharýashylyǵy qaldyqtaryn qaıta qoldaný tájirıbesimen bólisýge daıyn ekendikterin jetkizdi. «Bizdiń energetıkalyq saıasatymyz turaqtylyq pen tehnologııalyq damýǵa baǵyttalǵan. Pavılonymyz «Barlyq adamǵa arnalǵan bıoenergetıka» qurylymyna saı qurastyrylǵan. Bul Taıland úkimetiniń energetıkalyq strategııasyn júzege asyrýǵa septigin tıgizip qana qoımaı, bizdiń jergilikti fermerlerimizge de kómektesedi», dedi ol.
Basqosýda Qazaqstan Respýblıkasy Densaýlyq saqtaý vıse-mınıstri Alekseı Soı eki el arasynda tyǵyz dıplomatııalyq qarym-qatynas ornaǵanyn aıtyp, taı halqyna degen iltıpatyn áńgimeledi. «Ulttyq kúndi ótkizý qatysýshylarǵa óziniń mádenıetin, dástúrin, ómir súrý úlgisin jáne ulttyq taǵamdaryn kórsetýge múmkindik beredi. Taıland merekesi ekijaqty tıimdi áriptestikti nyǵaıtyp, sol eldiń bıznes qaýymdastyǵyna Ortalyq Azııa men TMD aýmaǵynda jetekshi kompanııalardyń biri atanýyna múmkindik beredi», dedi A.Soı.
Taıland pavılony kórme bastalǵaly kópshilik kóńilinen shyǵyp keledi. Halyqaralyq shara ashylǵaly beri pavılondy 100 myńǵa jýyq adam tamashalap úlgergen eken. 900 sharshy metrden asatyn taı aımaǵy oıyn-saýyq pen tanymdyqty úılestire qurylǵan úsh kórme zalynan turady. Onda ınteraktıvti demonstrasııa arqyly qant quraǵy, evkalıpt, kaýchýk, kúrish, júgeri, tapıokı, kóń men palma maıynan energııa alý tehnologııalarymen tanysýǵa bolady. Olar EKSPO-2017 kórmesinde úzdik bes pavılonnyń qatarynan kórinýdi kózdeıdi. Bul maqsatqa tyńǵylyqty daıyndalǵandary da kórinip tur.
Pavılonda birneshe uıym bólmelerin ashqan. Olardan taı memleketiniń ekonomıkasy, qolóneri, mádenıeti men týrızmi týraly barlyq aqparatty alýǵa bolady. Budan bólek, Taıland Investısııalar jónindegi keńesi 30 maýsym-5 shilde, 11-16 tamyz aralyǵynda iskerlik toptar men ınvestorlar úshin sheberlik synyptaryn ótkizbek. Sondaı-aq, taı teatry, beıneleý men qolónerine arnalǵan san alýan mádenı-buqaralyq sharalar josparlanǵan. Jaqynda memlekettiń Saýda mınıstrligi EKSPO-2017 kórmesine taǵy 16 kompanııa tartty. Olar «halal» ónimderin tanystyrady.
