Tamara Qasymqyzy aldymen Qyzyljar aýdanyndaǵy Báıterek aýylyna keldi. Onda mınıstr men aımaq basshysy Qumar Aqsaqalov byltyr boı kótergen mekteptiń jaraqtandyrylýymen, «Arýjan» shaǵyn ortalyǵymen tanysty.
Buryn oqýshylar aýdan ortalyǵyna qatynap oqysa, endi jergilikti jerde oqýǵa múmkindik alyp otyr. Jumys toby jergilikti FAP-ty aralap, turǵyndarmen kezdesti. Onda áleýmettik salada qolǵa alynǵan baǵdarlamalar jóninde áńgimelendi.
«Prezıdenttiń tikeleı tapsyrmysy boıynsha zeınetaqy men járdemaqy 20 paıyzǵa kóterildi. Basqa da qoldaýlar kórsetilip jatyr. Memlekettik jekemenshik áriptestik aıasynda balabaqsha, basqa da áleýmettik nysandar ashýǵa bolady», dedi Tamara Dúısenova.
Eńbek jáne turǵyndardy áleýmettik qorǵaý mınıstri aýdan ortalyǵynda «Jumyspen qamtýdyń jol kartasy-2020» memlekettik baǵdarlamasy aıasynda salynǵan 18 páterlik jataqhanada boldy. Munda ishki mıgrasııany retteý baǵdarlamasy sheńberinde ońtústik óńirlerden qonys aýdarǵandar turady.
«Qazir osynda turyp, páterdi jalǵa alyp otyrsyzdar. Keıin aqsha jınap, úı satyp alýǵa bolady. Eń bastysy – eńbek etip, aýdannyń, tutastaı alǵanda elimizdiń damýyna úles qosý», dedi vedomostvo basshysy.
Delegasııaǵa «Ahmýddınov» JK-i shyǵaratyn ónimder, jumysshylar úshin salynǵan jańa úıler kórsetildi.
«Petropavl aýyr mashına jasaý zaýyty» AQ-nyń bas dırektory Qýanysh Bıshimov mınıstrge ázirlengen tehnologııalyq jańǵyrtý baǵdarlamasy týraly aıtyp berdi. Basshylyq eńbekaqyny 35%-ǵa kóterýdi josparlap otyr. Munda úsh jyldan beri ushqyr rejımde dýaldy oqytý júıesi boynsha jumys isteıdi. Ol óndiriske jas mamandardy tartýǵa múmkindik.
«Jańa eńbek kodeksine sáıkes memleket eń tómengi eńbekke aqy tóleý, eńbek qaýipsizdigi standarttaryn belgileıdi. Bul standarttar qatań baqylanatyn bolady. Áleýmettik paketke, eńbekti qorǵaý qaýipsizdigi, eńbekke qabyldaý men jumys rejımine baılanysty qalǵan máseleler jumysshy ókilderi men jumys berýshilerge beriledi», dedi T. Dúısenova.
Oblystyq ákimdikte aktıvtiń qatysýymen 28 maýsym– 1 shilde aralyǵynda óńirde ótken «Ashyq esik» kúniniń jumys qorytyndylary shyǵaryldy.
«Basty mindet– turǵyndarǵa atqarylyp jatqan reformalardy keńinen túsindirý, ártúrli ádistemelik, praktıkalyq kómekter berý», dedi óz sózinde mınıstr.
Ol 2018 jyldan iske qosylatyn reformalardyń mańyzdylyǵy men aýqymdylyǵyn atap kórsetti. «2017-2020 jyldarǵa arnalǵan Qunarly jumyspen qamtý jáne jappaı kásipkerlikti damytý baǵdarlamasyna júzege asyrýǵa jergilikti bıliktiń nazaryn aýdardy. Daǵdarysqa qarsy sharalardy keshendi júrgizýge, jańa jumys oryndaryn ashýǵa jumyla atsalysýǵa shaqyrdy.
О́mir Esqalı,
«Egemen Qazaqstan».
Soltústik Qazaqstan oblysy
