«Jas kúnimde beınet ber, qartaıǵanda zeınet ber» deıdi dana halqymyz. Bolashaqty jastardyń qolynda desek te, keleshegińniń kemel bolýy úshin de qarttardyń róli zor. OQO, Sozaq aýdanynyń da ardagerleriniń jasynan tartqan beınettiń zeınetin kórip otyrǵan jaıy bar. Biri muǵalim, biri agronom, endi biri memlekettik qyzmetten zeınetkerlikke shyqqan sozaqtyq asqar taýdaı atalar men aq samaıly ájeler búginde Astana tórinde júr. Qurylǵanyna 30 jyl tolǵan respýblıkalyq «Ardagerler uıymy» qoǵamdyq birlestiginiń aımaqtyq fılıaldarynan «EKSPO-2017» kórmesine alǵash bolyp Sozaq aýdanynyń qarııalary qonaq bolǵanyn aıta keteıik.
Qyryq ardagerdiń basyn qosyp, ońtústikten Arqa tórine at terletip kelgen Sozaq aýdanynyń Qurmetti azamaty, aýdandyq Ardagerler keńesiniń tóraǵasy Qabylbek Espenbetov: «Biz kópti kórdik. Biraq, dál mundaı álemdik kórme, máni zor taqyryptar talqylanatyn biregeı shara elimizde ótedi dep eshqashan oılamappyz. О́zimniń de, qarııalardyń da kórmeden alǵan áseri sózben aıtyp jetkizýge kelmeıdi. Barshamyz bolashaǵymyz qalaı bolar eken dep alańdap júrmiz ǵoı. Áıtse de, keleshegimizdiń kemel bolaryna kórme arqyly kózimiz jetti. Osy istiń basynda turǵan Elbasy Nursultan Nazarbaevqa bárimiz sheksiz rızamyz. Al, buǵan deıin óńir basshysy Janseıit Túımebaev «EKSPO-2017» týraly bizge nasıhattap aıtyp kelgen bolsa, endi minekı, óz aıaǵymyzben kelip, kózimizben kórip, qolymyzben ustaýǵa múmkindik aldyq. Soǵan bar jaǵdaıdy jasaǵan oblys, aýdan basshylyǵyna ardagerlerdiń atynan alǵysymdy jetkizgim keledi,-deıdi.
Ońtústik óńirinen kelgen qarııalarymyz «EKSPO-2017» kórmesinen bólek, qýǵyn-súrgin qurbandaryna arnalǵan «ALJIR» memorıaldyq mýzeı-keshenine baryp repressııa kezindegi tarıhı aqtańdaqtardyń kýási bolsa, jýyrda ǵana kúrdeli jóndeýden ótken Astananyń sımvoly «Báıterek» monýmenti jáne «Beıbitshilik pen kelisim saraıymen» tolyǵyraq tanysty. Olardyń kóbi «ALJIR» mýzeıindegi jádigerlerdiń qatty áser etkenin aıtsa, endi biri «EKSPO-2017» kórmesindegi «Nur álem» pavılonynyń basqa memleketterdikine qaraǵanda tartymdy ári ishindegi qundy dúnıeler men málimetterdiń utymdy uıymdastyrylǵanyn tilge tıek etti.
Nurdáýlet JEŃIS
