Osy oraıda halyq pen naryq arasyndaǵy baılanys kún saıyn bekı túsýde. Negizinen tutynýshylarǵa baǵasy qoljetimdi ári sapaly ónimder qajet. Búgingi tańda turǵyndardyń mundaı suranysyna ózgeniń óniminen góri, ózimizdiń otandyq ónimderimiz jaýap bere alady. Endigi jerde otandyq ónimderdiń bási artyp, básekege qabilettiligi arta túspek.
Merki aýdanyndaǵy «Mahabat álemi» ámbebep saýda ortalyǵy kópshilikke aıan. Jýyrda atalǵan saýda ortalyǵynda «Dámdi sebet» áleýmettik dúkeni ashyldy. Dúkenniń aýmaǵy myń sharshy metrdi quraıdy. Sondaı-aq munda kelýshilerge otyz adam qyzmet kórsetedi. Sonymen qatar, dúkende jyl boıy taýarlardyń belgili bir túrine aksııalar da ótkizilip turady. Tipti sýperaqsııalar kezinde zattardyń baǵalary 40-50 paıyzǵa deıin arzandaıdy eken. Bul da naryqtyń halyqqa degen qamqorlyǵy bolsa kerek.
Atalǵan dúkenniń bir ereksheligi – munda azyq-túliktiń basym bóligi otandyq ónimderden turady. Máselen «Qazaqstanda jasalǵan», «Qazaqstan», «Baıan sulý», «Gúlder» konfetteri óz ónimderimiz bolyp sanalady. Al «Asqan», «Oleına», «Zarechnaıa» sııaqty ósimdik maılary da otandyq ónim retinde halyqqa qoljetimdi baǵada saýdalanyp otyr.
Bul ortalyqtyń ashylýy merkilikter úshin aıtarlyqtaı jańalyq boldy. Rasynda da halyq keregin alý úshin burynǵydaı oblys ortalyǵyna sabylmaı, osy jerden-aq saýda jasaı beredi. Sondaı-aq mundaǵy zattardyń bári de qoljetimdi ári sapaly. Endi otandyq ónimderimizdiń ıgiligin aýdan, aýyl halqy da kóretin bolady.
Hamıt Esaman,
«Egemen Qazaqstan»
Jambyl oblysy
