Sh.Ýálıhanov atyndaǵy QǴA-nyń syılyqtyń laýreaty, Qazaqstan Respýblıkasyna eńbek sińirgen qaıratkeri qazaqtan shyqqan tuńǵysh gobelenshi qyzdyń tartymdy týyndylaryn tamashalaýǵa ónerdi baǵalaıtyn jurtshylyq molynan jıyldy.
Gobelenniń tarıhy shet elderde 4-5 ǵasyr buryn bastalǵanymen, bizdiń elimizde onymen aınalysýshylar ótken ǵasyrdyń 70-jyldary shyǵa bastady deýge negiz bar. Erler arasynda tuńǵysh gobelenshi retinde Qurasbek Tynybekov tanylsa, halyq qyzdar arasyndaǵy tuńǵysh gobelenshi dep Bátıma Záýirbekovany aýyzǵa alady. Anasynyń oıý oıyp, syrmaq syrǵanyn kórip ósken, ózi sýretshilikti támamdaǵan Záýirbekovanyń ónerdiń bul túrimen bite qaınasýynyń bir syry – gobelenniń, ıaǵnı, qazaqsha aıtqanda kartına kóleminde kishireıgen taqyr kilemniń tehnologııasyn onyń bala kezden kórip óskeninde bolsa kerek. Eýropada tańsyq dúnıelerdiń bizdiń elimizde tańsyq emestigi, kúni keshege deıin árbir qazaq áıeliniń kıiz basyp, kilem toqýmen aınalysqany, biraq ony tek turmystyq deńgeıde tutynatyn zattar retinde ǵana qarastyryp, úlken óner retinde nasıhattamaýy sýretshiniń «taqyr kilemge» basqasha kózben qaraýyna áser etken sııaqty. О́ziniń ishki álemin, tirshilikke kózqarasyn, sulýlyqty sezinýin Bátıma solaısha qylqalammen qosa jippen de órip, órnekteýge bel býǵan.
Bátıma Záýirbekova tek óz elimizben shektelmeı, Fransııa, Italııa, Ulybrıtanııa, Germanııa, Túrkııa, álemniń taǵy da basqa birqatar memleketterinde jeke kórmesin ótkizip júrgen aıtýly sheber. Kórmege onyń 60-tan asa kórkem týyndylary qoıyldy. Sonaý jastyq shaǵynda salǵan eń ataqty týyndylaryna qosa, keıingi kezdegi tamasha shyǵarmalary da kórermen kózaıymyna aınaldy.
Sharaǵa jıylǵan qaýymdy Mádenıet jáne sport mınıstri Arystanbek Muhamedıuly quttyqtady. Ol beıneleıtin sulý da syrbaz ári jumbaq názik jandylardyń óner áleminde «Záýirbekovanyń arý qyzdary» degen ataýmen tanylǵanyn atap ótti. Sondaı-aq, tarıh ǵylymdarynyń doktory Shaızada Toqtabaeva sýretshi-gobelenshiniń shyǵarmashylyǵyn qazaq ónerindegi jaryq qubylysqa teńedi. Onyń jumystaryndaǵy erekshelik retinde pozıtıvti kóńil kúıdi, názik sulýlyqty aıtty. «Qazir jahandaný ǵasyry deımiz. Bizdiń tirshiligimizde kóptegen jaǵymsyz qubylystar oryn alýda. Onyń ishinde terrorızm, basqa da degradasııalar bar. Al, Bátımanyń óz álemi bar. Ol – sulýlyq, tynyshtyq álemi» − degen ǵalym B.Záýirbekovanyń qazaq halqynyń mádenı bastaýlarynan nár alǵan shyǵarmashylyǵy ultymyzdyń poetıkalyq dúnıetanymynan habar berip, etnıkalyq tanym-túsinigin saqtaýǵa kómektesetinin aıtty.
Aıgúl SEIILOVA,
Sýretti túsirgen Erlan OMAROV,
«Egemen Qazaqstan»
