Búgin «Baýyrjan» qaıyrymdylyq qory men Almatydaǵy Qytaı Halyq Respýblıkasynyń Bas konsýldyǵy, QR ústel tennıs federasııasy elimizde alǵash ret balalar úıiniń tárbıelenýshi qyzdary arasynda pıng-pong týrnıriniń bastalǵany týraly jarııalady. Sondaı-aq, týrnır uıymdastyrýshylary atalmysh joba aıasynda elimizdiń túkpir-túkpirindegi 100 jetimder úıin 100 tennıs oınaıtyn ústel men jabdyqtarymen qamtamasyz etedi. Bir aı kóleminde barlyq balalar úılerine tennıs ústelderi ornatylyp, bolashaqta balalar úıiniń tárbıelenýshileri Olımpıadalyq sport túrine enetin ústel tennısinde jattyǵýǵa jaqsy múmkindik almaq.
Týrnırdiń alǵashqy irikteý oıyndary 5 shildede Almatydaǵy Qazaqstan ústel tennısi federasııasynda bastalady. Joba tálimgeri retinde qazaqstandyq tanymal akter, ssenarıst Erden Telemisov qatysady.
Týrnır 7-10 jáne 11-15 jastaǵy oqýshylar arasynda ótedi. Osynaý týrnır arqyly ata-anasyz balalar arasynan ústel tennısiniń talanttaryn taýyp, atalmysh sport túrin alǵa jyljytý kózdelip otyr.
«Pıng-pong hanshaıymy» ústel tennısiniń aımaqtyq oıyndary Qazaqstannyń túkpir-túkpirinde 05-28 shilde aralyǵynda ótedi. Týrnırdiń fınaldyq oıyndary Almaty qalasynda 22-24 tamyzda márege jetedi. 150 sportshynyń ishinen irikteletin eki jeńimpaz Qytaı Halyq Respýblıkasynyń úzdik sport akademııasyna joldama alyp, qytaı sportshylarynyń arnaıy sheberlik-synyptarynan ótedi.
Aınash ESALI,
«Egemen Qazaqstan»
ALMATY
