Sharanyń resmı bólimi Qazaqstannyń Energetıka vıse-mınıstri Maǵzum Myrzaǵalıevtiń sózimen bastaldy. «Amerıkanyń EKSPO-2017 kórmesine belsendi qatysyp jatqanyn jáne jasyl energetıkany damytýǵa joǵary úles qosqanyn aıryqsha atap ótkenimiz jón. Sonymen qatar, AQSh-tyń elimizben berik qarym-qatynasyna rızashylyǵymyzdy bildiremiz. Ekijaqty yntymaqtastyq nátıjesinde amerıkalyq «Shevron» jáne «Ekson mobıl» kompanııalary qazaqstandyq munaı naryǵyn ıgerýge atsalysyp, biz úshin senimdi seriktestikterge aınaldy.
Taǵy da aıta keterligi, AQSh-tyń jańartylatyn energııa kózderin zertteýdegi tájirıbesi Qazaqstannyń úlken qyzyǵýshylyǵyn týdyrdy. Olar – jasyl tehnologııadaǵy jınaqtaǵan tájirıbesi turǵysynan eń ozyq elderdiń qatarynda. Sondaı-aq, júzdegen amerıkalyq kompanııa jańartylatyn energııaǵa kóshý jahandyq bastamasyn qoldaǵan», dedi ol.
Jıynda AQSh elshisi, pavılonynyń komıssary Djordj Kroll qazaq tilin ájeptáýir biletinine kópshiliktiń kózin jetkizdi. Qazaqstan tarapynyń ystyq yqylasyna kóńili tolǵandyǵyn bildirgen komıssar pavılondary jaıynda áńgimeledi. «Biz «Bolashaq energııasy» taqyrybymen shabyttanyp, «Sarqylmas energııa kózi – árqaısymyzdyń ishimizde» degen ıdeıany jetkizgimiz keledi. О́zimizdiń energııamyz arqyly biz tańǵalarlyq nátıjelerge jetkizetin ınnovasııalardy yntalandyramyz. AQSh pen Qazaqstan arasyndaǵy qatynastardyń energetıkasy Amerıka pavılonyn ıdeıadan shynaıy jetistikke alyp baratyny sózsiz. AQSh pen Qazaqstan arasyndaǵy seriktestik tek saıası lıderler arqasynda ǵana emes, jeke sektor men adamdardyń arasyndaǵy qatynastardyń nátıjesinde de nyǵaıa tústi», dedi D.Kroll.
Basqosýdyń ekinshi bólimindegi konsertti júrgizgen amerıkalyq jastardyń qazaqshasy aǵylyp turmasa da, áńgimelesýge jarap tur. Al sahnaǵa tanymal Greıs Garret shyǵyp, óziniń «ýkelele» atty aspabymen «Dýdaraıdy» aıta bastaǵanda, kózine jas alǵan kórermender boldy.
Amerıkalyqtar munymen shektelgen joq, AQSh halqynyń bostandyǵyn, erkin oılaý qabiletin barynsha kórsetti. Qazaqtyń kúıleri men ózderiniń áýenderin úndestirip, pappýrı oryndady. Tipti, «Qamajaı» ánine bılep, ony da ulttyq mýzykasymen sheber úılestirdi.
Mádenı sharanyń sońy jappaı bıge ulasty. Sodan keıin qatysýshylar merekelik sherýmen AQSh pavılonyna attandy. Sherýdiń basynda álemge áıgili «Harley-Davidson-nyń» eki motosıkli, onyń artynda áskerı kýrsanttar men cherlıdırshi qyzdar júrdi. Pavılonǵa kelýshilerge «Sheksiz energııa kózi degenimiz ne?» degen saýal qoıy-
lady. Sodan soń bolashaq energııasyn aıqyndaıtyn fılm kórsetiledi. Kópshilik kelesi bólikte «О́mir energııasy» dep atalatyn tańǵajaıyp shoýdy tamashalaıdy. Shoý bir mezgilde úsh úlken ekran arqyly kórsetilip, keıin kópqabatty eden arqyly keńeıip, jalǵasady. Dál osy kezde kireberiste qoıylǵan saýaldyń jaýaby shyǵady. Sonymen qatar, AQSh pen Qazaqstan arasyndaǵy dostyqtyń damýy jaıly málimet beriledi.
AQSh pavılonynyń mádenı-buqaralyq sharalary osymen bitpeıdi. Bıyl memlekettiń táýelsizdigine 241 jyl tolyp otyr. Osyǵan oraı, AQSh mádenıetine arnalǵan merekelik aptalyq uıymdastyrylady. Sonyń aıasynda amerıkalyq rok, blıýgrass, soýl men hıp-hop óneri kórsetiledi.
Toptamany ázirlegen Ashat RAIQUL,
Sýretterdi túsirgender Erlan Omarov, Orynbaı Balmurat,
«Egemen Qazaqstan»
