Áýelde Alataýdyń baýraıyndaǵy ásem qalany kópshilikke aıaqastynan qıyp ketý múmkin emesteı kóringen. Solardyń qatarynda ózim de bar edim... Bir jaǵy osyndaı baqqa oranǵan jasyl qalada ózim týyp-óstim emes pe? Basqa jerden dál osyndaı qulpyrǵan qala salý qoldan kelmeıtin is sekildi edi?! Ýaqyttyń jyldamdyǵyn sezinip te úlgerer emespiz, mine, Astanadaı ásem qala kóz aldymyzda ósip-órkendedi. Kóziń súısinedi, kóńiliń án salady! Qazirgi EKSPO saltanaty kezinde elimizdiń bas qalasyna at basyn buryp kelgen álem jurshylyǵynyń ásem qalamyz týraly pikirlerin estigende, kóńiliń tipti jadyrap ketedi eken. Osyndaıda bir kezeńde tabıǵaty adam kúshin moıyndamaıtyn óńirden qala salý múmkin emes degen oı qushaǵynda bolǵanyń úshin uıalyp ta qalady ekensiń. Aınalyp kelgende, azamattyǵy men asqar taýdaı armanyn bir arnaǵa toǵystyryp, arman qalany aıaǵynan tik turǵyzǵan Nursultan Ábishulyna basyńdy ıip turyp alǵysyńdy jaýdyrǵyń-aq keledi!
Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev Eýrazııanyń kindiginde bolashaqtyń qalasyn saldy. Álem jurtshylyǵynyń ókilderi – dúnıe júziniń nebir alpaýyt memleketteri basshylarynyń ózi Astananyń tórinde halyqaralyq mámilelerge qol jetkizip, Qazaqstannyń dańqyn arttyrdy. Qazir álemdik sarapshylar qaýymy Astanany aımaqtaǵy Dýbaı qalasymen teńestirip jatyr. Budan on-on bes jyl buryn ondaı oı aıtylar ma edi, oılanyńyzshy? Aıtylsa, oǵan el sener me edi? Mine, Astana shaharynyń búgingi bolmysy, búgingi tańdaýy dál osyndaı mártebege ıe! Osyndaıda Elbasymyz Nursultan Nazarbaevtyń bolashaqty boljaı bilgen kóregen saıasatyna súısinesiń.
Jalpy, qyzmet barysynda meniń óz basym Nursultan Ábishulymen san ret kezdestim. Alaıda, solardyń ishinde eki ret júzdeskenim meniń esimde umytylmastaı bolyp qaldy... Onyń ózindik sebebi de joq emes. Eki kezdesýde de Elbasyna áńgime arasynda ótinish aıtyp úlgergenim bar. Onyń birinshisi Qazaqstannyń BAQ-taryna qatysty edi. Ol kezde uıǵyr tilindegi gazetti basqarǵanymmen, tilimdi syndyryp, ýnıversıtettegi orys tilindegi fakýltetti bitirdim. Bilimimdi odan ári Máskeýde jetildirdim. Meniń bar armanym – ózimizdiń ál-Farabı atyndaǵy QazMÝ-diń osy fakýltetiniń janynan uıǵyr bólimin ashý edi.
Talaı esikti qaǵyp júrip, aldaǵy 10 jyldyń kóleminde qansha uıǵyr tildi jýrnalıst kerektigin saralap, ol bólimdi ashtyq ta. Eńsemiz endi kóterilgende, ýnıversıtettiń sol kezdegi rektory bala sany jetimsiz degen syltaýmen ol bólimdi japty. Bir qyzyǵy, meniń izimshe, koreıler men nemister fakýltet janynan sondaı bólim ashyp alǵan edi. Istiń oraıy kelse jaqsy ǵoı, bir shara ústinde Nursultan Ábishulymen júzdesip qaldym da, ýaqytynyń tapshylyǵyna qaramastan, jaısyz bolsa da álgi problemany jaıyp saldym. Elbasy óziniń Ákimshiligindegi salaǵa qatysty bir áriptesimdi shaqyryp aldy da, «Keńseniń syrtynda ne bolyp jatqanyn bilmeısińder», dep jedel tapsyrma berdi. Jurttyń qýanyshynda shek joq, bólim qaıta ashyldy.
Qazaqstan halqy Assambleıasynda júrgen kezimde Qazaqstandaǵy, tipti Ortalyq Azııadaǵy deıikshi, jalǵyz ǵana uıǵyr teatryna jabylý qaýpi tóndi. Elbasy Almatyǵa saparmen kelgende, Assambleıanyń jumysymen tanysty. Sondaı sátti paıdalanyp, teatrdyń basyna tóngen qaýip bulty týraly táptishtep baıandadym. Muqııat tyńdaǵan Nursultan Ábishuly sol jerde sala qyzmetkerlerine tapsyrma berdi. Teatrdyń jańa turpatta ashylý saltanatyna ózi kelip qatysatynyn eskertti. Rasynda da, keıin teatrdyń alǵashqy sahnalyq qoıylymyna Nursultan Ábishulynyń ózi keldi. Biregeı óner otaýynyń qyzmetine, qazaq ónerindegi onyń alar ornyna toqtalyp, oń baǵasyn berdi.
Qandaı bir sátte elimizdegi azamattardyń muqtajyna, qajetine aıryqsha kóńil bólip, onyń oryndalýyn muqııat nazarda ustaıtyn Elbasynyń osy bir qasıetterine men óz ómirimde osylaısha kýá bolǵan jaıym bar. Kún sanap qulpyryp, qanatyn keńge jaıyp kele jatqan aıshyqty Astananyń sán-saltanatyn kórgen saıyn, shahar salýdaǵy Nursultan Ábishulyna ǵana tán muqııattylyq nyshanyn anyq ańǵaramyn.
Iýldash AZAMATOV,
«Qazaq gazetteri» JShS
Bas dırektory – Redaktorlar keńesi tóraǵasynyń keńesshisi
