Qazaq halqynyń, onyń ishinde kóshpendiler órkenıetin sıpattaıtyn qalany jobaǵa avtorlary «Bozoq» degen ataý bergen. Dúıim jurtpen birge qalashyqtyń ashylýyna Astana ákimi Áset Isekeshev qatysyp, qala turǵyndaryn baǵanaly ordanyń mereıli merekesimen quttyqtady.
Joba avtory Jandos Qyryqbaevtyń aıtýynsha, kóshpendiler qalashyǵyn turǵyzýǵa eki aı boıy jumys istegen. Atalǵan keshen úsh aı boıy – 10 qyrkúıekke deıin elorda turǵyndary men meımandary úshin jumys isteıtin bolady. Tańerteńgi saǵat 10.00-den keshki 22.00 aralyǵynda «Bozoqqa» kelgen qonaqtar salt-dástúr men tarıhtan syr shertetin teatrlandyrylǵan kórinisterdi tamashalaı alady.
«Kópshilik kóshpendilerdiń turmys-tirshiligin tanystyratyn osyndaı keshenderdi etnoaýyl dep ataıdy. Menińshe ol durys emes. Bizdiń ata-babalarymyz tek aýylda turdy dep kim aıtty? Orta ǵasyrda qazaq dalasynda qanshama qalalar bolǵan. Sol sebepti, biz keshendi «Bozoq» kóshpendiler qalasy dep atadyq. Kún saıyn bul keshende túrli mádenı sharalar men teatrlandyrylǵan qoıylymdar ótkiziledi», - dedi medıa ortalyqtyń tilshisine bergen suhbatynda kóshpendiler qalashyǵy jobasynyń avtory ári jetekshisi J.Qyryqbaev.
Sondaı-aq qalashyqtyń ishinde túrli kórmeler men jármeńkelerdiń uıymdastyrylatynyn da aıtty. Ismerler men ustalardyń qolynan shyqqan turmystyq jabdyqtar men zergerlik jáne turmystyq buıymdar satylymǵa qoıyldy. Sondaı-aq aq jaýlyqty ájeler men on saýsaǵynan bal tamǵan ismerler jınalǵandarǵa ulttyq buıymdardy jasaýdan sheberlik synyptaryn ótkizedi. Kóshpendiler qalasynyń ashylý saltanatyna halyqpen birge Astana ákimi Áset Isekeshev qatysyp, jınalǵandardy elorda kúnimen quttyqtady.
«Qurmetti Astana qalasynyń turǵyndary jáne qonaqtary! Barshańyzdy Astana kúni merekesimen shyn júrekten quttyqtaımyn. Barlyqtaryńyzǵa zor densaýlyq, baq-bereke tileımin. Árqashanda qýanysh pen sáttilik baýlap júrsin. Astanamyz kórkeıe bersin. Mereke qutty bolsyn!», - dedi elorda basshysy óz sózinde. Sonymen birge óz quttyqtaýynda jańa elordanyń negizin qalaýshy ári avtory Elbasy Nursultan Nazarbaevtyń sózin tilge tıek etti.
«Astana halqymyzdyń múmkindigi men elimizdiń jańarýynyń sımvoly bolyp tabylady. Osy kúnderi elordamyzda eki myńnan astam túrli mádenı-buqaralyq sharalar ótip jatyr. Barlyq saıabaqtar men gúlzarlarda, qalanyń shet aýdandarynda merekelik konsertter men festıvalder, túrli shoýlar ótkizilip jatyr. Munyn barlyǵy qala turǵyndarynyń merekeni sezinýi úshin jasaldy. О́ıtkeni, bul mereke jalpyhalyqtyq meıram. Ony tek elordada ǵana emes, elimizdiń barlyq aýmaǵynda keń aýqymda toılanýda. Osyǵan oraı barlyqtaryńyzǵa tek jaqsylyq, baqyt pen amandyq tileımin», - dedi Á.Isekeshev aqjarma tilegin túıindeı kele.
Astana ákimi keshenniń aýmaǵyndaǵy qaınaǵan tirlikpen tanysyp, merekelik qoıylymdy tamashalady. Biri jún tútip, biri urshyq ıirip otyrǵan ismer ájelerdiń oryndaýyndaǵy ándi tyńdap, qurmetin bildirdi. Tipti, sheberler jármeńkesine baryp, estelikke ulttyq naqyshtaǵy kádesyıdy satyp aldy. Aqshańqaı úıge bas suǵyp, ulttyq taǵamnan da dám tatty.
