Memlekettik mınıstrmen kezdesýi barysynda taraptar ekijaqty qarym-qatynastardyń jaıy men perspektıvalardy, ózekti halyqaralyq jáne óńirlik máselelerdi, sondaı-aq Taıaý Shyǵys óńiriniń aǵymdaǵy ahýalyn talqylady.
Suhbat barysynda Iordanııa Koroli Abdalla II ben Ál-Hýseınniń Qazaqstanǵa resmı saparyn uıymdastyrý boıynsha máselesine asa nazar aýdaryldy. Iordanııanyń memlekettik mınıstri qazaqstandyq taraptyń usynysyn mindetti túrde ıordan monarhynyń nazaryna jetkizetinine sendirip, Amman resmı suraqty muqııat qarastyratynyn jetkizdi.
B.Hasaýna QR Prezıdenti Nursultan Nazarbaevtyń álemdik máselelerdi retteý jolyndaǵy úlesin erekshe atap ótti. Memlekettik mınıstrdiń sózine sáıkes, Iordan tarapy Sırııada turaqtylyqty jáne beıbitshilikti ornatý isinde Astanalyq prosesiniń jáne Sırııadaǵy turaqtylyǵyna mándiligin erekshe tanyp, qazaqstandyq kelissóz alańy sırııalyq daǵdarysty retteýge óz úlesin qosatyndyǵyna úmit artty.
Iordanııa Qazaqstandy jaqyn ári dos memleket retinde qarastyratynyn qýattap, ekijaqty qarym-qatynastardy nyǵaıtýǵa múddeli ekendigin jetkizdi. Iordandyq tarap 2017 jyly 10-11 qyrkúıekte Astanada ótetin Ǵylym jáne tehnologııalar jónindegi IYU birinshi sammıtine joǵary deńgeıde qatysatyndyǵyna sendirdi.
QR Syrtqy ister mınıstriniń orynbasary Qazaqstandaǵy sońǵy mańyzdy is-sharalar, ásirese ótken ShYU sammıti men jýyrda ashylǵan «EKSPO-2017» Halyqaralyq mamandandyrylǵan kórmesi jóninde habardar etti. Oraıly sátti paıdalana otyryp, ol ıordanııalyq tarapty kórmege qatysýǵa shaqyrdy. Kórme ekijaqty yntymaqtastyqty keńeıtý úshin tıimdi platforma bola alatyndyǵyna nazar aýdaryldy.
Ekijaqty qarym-qatynastardyń tarıhynda alǵashqy saıası konsýltasııalar barysynda A. Qamaldınov pen ıordanııalyq delegasııanyń basshysy Syrtqy ister jáne ekspatrıanttar jónindegi mınıstrliginiń bas hatshysy Zeıd ál-Laýzı saıası, ekonomıka, ınvestısııalar jáne áleýmettik-mádenı salalaryndaǵy ekijaqty yntymaqtastyq boıynsha máselelerin, halyqaralyq uıymdar aıasyndaǵy eki el arasyndaǵy ózara is-qımyldyń jaǵdaıy men keleshekterin, sonymen birge Taıaý Shyǵys óńiriniń aǵymdaǵy ahýalyn talqylady.
Konsýltasııalar barysynda qos tarap 2016 jylǵy 7-8 qyrkúıek aralyǵynda Astana qalasynda ótken Qazaqstan-Iordanııa Caýda-ekonomıkalyq jáne mádenı-gýmanıtarlyq yntymaqtastyq jónindegi úkimetaralyq komıssııasynyń Hattamasyn sapaly oryndaýǵa ýaǵdalasty. Sonymen qatar taraptar halyqaralyq uıymdar jáne 2017-2018 jj. BUU Qaýipsizdik keńesinde Qazaqstannyń músheligi sheńberinde syndarly yntymaqtasýǵa ýaǵdalastyqqa jetti.
