Balalar alańy, eresekterge arnalǵan sporttyq alań, voleıbol alańy, dámhana, avtoturaq, kıinip-sheshinetin oryndar deısiz be, barlyǵy da qarastyrylǵan. Jaǵalaý qalyń qamystan tazartylyp, qum tógilip, kelýshiler úshin birneshe kıiz úı tigilipti.
«Az ýaqyttyń ishinde bul jerde aýqymdy jumys júrgizilgeni baıqalady. Aýdan ákiminiń az eńbektenbegeni kórinip tur. On kúnniń ishinde munda oblys turǵyndary kútkendeı jumys jasalǵan. Jol jóndelgen. Barshalaryńyzdy Astana kúni merekesimen quttyqtaımyn. Demalys ortalyǵynyń ashylýy Elorda kúnine jasalǵan tamasha tartý boldy ǵoı dep oılaımyn. Endi oblystyń ǵana emes, elimizdiń ózge óńirleriniń turǵyndary osy jerge kelip, tynyǵady dep senemiz», - dedi kóldiń jaǵalaýyndaǵy abattandyrý jumystarymen tanysqan oblys ákimi Danıal Ahmetov.
Negizinde kól jaǵasyn abattandyrý jumystary 2016 jyly bastalyp, bıyl sýǵa túsý maýsymy bastalǵanǵa deıin aıaqtalýǵa tıis bolatyn. Osydan eki apta buryn aımaq basshysy jaǵalaýdyń jaǵdaıymen tanysýǵa kelip, mundaǵy jasalǵan jumystarǵa kóńili tolmaı: «Palatkaǵa qonsań da jaǵajaıdy retke keltir» dep Ulan aýdanynyń ákimi Dáýlet Batyrbaevqa 10 kún ýaqyt bergen-di.
Bir jarym jyldyń ishinde jasalmaǵan jumystyń on kúnde júzege asqanyna kóńili tolatynyn jetkizgen oblys ákimi óńirdegi demalys oryndaryn abattandyrý jumystary odan ári jalǵasatynyn, jaqyn arada Alakól jaǵalaýy saltanatty túrde ashylatynyn aıtty.
Erekshe atap óterligi, bul - Sibe kólderindegi zaman talabyna saı jaraqtalyp, abattandyrylǵan alǵashqy jaǵajaı. Altynshy shilde, ıaǵnı dál Astana kúni merekesinde úshinshi Sibe kóline О́skemennen qatynaıtyn avtobýs baǵyty iske qosylǵan bolatyn.
Azamat Qasym,
«Egemen Qazaqstan»
Shyǵys Qazaqstan oblysy,
Ulan aýdany
