Daýlar quqyqtyq negizde sheshilmek

Almatyda ekonomıka sala­syn­daǵy daýlarǵa baılanysty isterdi qaraıtyn joǵary arbıtraj, ekonomıkalyq, sharýa­shy­lyq jáne basqa da sottar tór­aǵa­larynyń kezekti VIII májilisi óz jumysyn aıaqtady. Halyqaralyq deńgeıdegi jıyndy kirispe sóz sóılep ashqan Joǵarǵy Sot tóraǵasy Bektas Beknazarov sot tóraǵalarynyń kezekti segizinshi májilisiniń, sonymen birge al­daǵy basqosýlardyń da tabysty bo­la­tyn­dyǵyna senim bildirdi. Joǵary arbıtraj, ekonomı­ka­lyq jáne sharýashylyq sottar tóraǵalarynyń basqosýyna qa­tys­qan Reseı, Belarýs, Tá­jik­stan, Qyrǵyzstan jáne Qazaq­stan memleketteriniń ókilderi jı­ynda negizinen ıntegrasııa jaǵ­daıyndaǵy TMD elderi kedendik zańnamasy, kóliktik qaty­nas, memlekettik baj salyǵyn qaıtarý tóńiregindegi másele­ler­di jan-jaqty talqylap, pikir al­masty. TMD elderi arasynda eko­nomıkalyq, sharýashylyq jáne ózge de salalarda tyǵyz baıla­nys ornatylǵannan keıin bul memleketter arasynda týyndaı­tyn túıtkilderdi birlese otyryp sheshýdiń mańyzy zor. Jańa jyl­dyń 1 qańtarynan bastap óz ju­my­syn bastaıtyn EýrAzEQ so­tyn qurý jáne ózge de aýqymdy isterdiń kópke ortaq ekendigi aıdaı aqıqat. Táýelsiz Memleketter Dostas­ty­ǵy aıasynda qurylyp, birneshe jyldan beri jumys atqaryp kele jatqan ekonomıkalyq sottyń EýrAzEQ sotynyń qurylýyna oraı keleshekte bir-biriniń quzy­retine aralasyp ketýi múmkin be, álde ekonomıkalyq sot óz ju­mysyn toqtata ma? TMD elderi sot tóraǵalary bul túıinniń kóp­shilikke tıimdi ári ortaq sheshimin tabý tóńireginde de oı bólisti. Eń bastysy, bul sot­tardyń óz qyz­metterinde birin-biri qaıtala­ma­ǵany jón. Keden odaǵyna múshe mem­le­ket­terdiń ekonomıkalyq ynty­maq­tastyǵynyń aıasy keńeıip, te­reń­deı túsken kezeńde halyq­aralyq kelisimdi túsindirýge baı­lanysty daýly máselelerdiń oryn alýy ábden múmkin. Sala bas­shylarynyń pikirinshe, soǵan oraı keden saıasatyn iske asy­rýmen jáne kedendik retteý is-sharalarymen baılanysty keli­sim-sharttardyń quqyqtyq negizin odan ári jetildirýdiń tıimdiligi de, qajettiligi de orasan. Baqyt BALǴARINA, Almaty.