– Tórt jyldyń ishinde sizderge 3 myń adam, onyń ishinde 1800 oqytýshy, 12 Ulttyq ǵylym akademııasynyń akademıgi, 10 Memlekettik syılyqtyń laýreaty, 9 burynǵy mınıstr, 7 burynǵy Senat depýtaty, álemdegi eń úzdik ýnıversıtetterden kelgen 400-den astam belgili professorlar dáris berdi. Sizder – baqytty jastarsyzdar. Ýnıversıtet dıplomymen qosa, «Astana» atty ómirlik ýnıversıtettiń tálimin de aldyńyzdar. Sizder oqyǵan tusta elordamyzda tarıhı sátter kóp boldy. Sonyń biri – EKSPO halyqaralyq kórmesi. Sizderdi dıplom alý saltanatymen shyn júrekten quttyqtaımyn! – dedi ýnıversıtet rektory Erlan Sydyqov.
Rektordyń aıtýynsha, ýnıversıtet óziniń 21 jyldyq tarıhynda 50 myń túlek ázirledi. Saltanatty jıynda rektor 50 myńynshy dıplomnyń ıesin atady. 50 myńynshy túlek – Eýrazııa ulttyq ýnıversıtetiniń jýrnalıstıka fakýltetin támamdaǵan Bekarystan Amanjolov esimdi túlek bolyp shyqty. Ol − byltyrǵy «Úzdik spıker» respýblıkalyq baıqaýynyń jeńimpazy jáne halyqaralyq pikirtalas týrnırinde top jarǵan talantty stýdentterdiń biri. B.Amanjolov ýnıversıtet ustazdarynyń údesinen shyǵýǵa, el damýyna úles qosýǵa ýáde berdi.
Atalǵan sharaǵa Aqmola oblysynyń ákimi Málik Myrzalın, Halyq qaharmany Talǵat Musabaev, akademıkter Bolat Kómekov, Rahmetqajy Bersimbaı, Ǵarıfolla Esim, Eltańba avtory Jandarbek Málibekov jáne basqa da belgili tulǵalar qatysyp, túlekterge aq jol tiledi.
Dýman Anash,
"Egemen Qazaqstan"
