Otan qorǵaýshylardyń patrıottyq sezimin nyǵaıtý maqsatynda uıymdastyrylǵan kórsetilim Qazaqstan Respýblıkasynyń №7552 Ulttyq ulan áskerı bóliminiń áskerılerine arnalyp qoıyldy.
Otandyq kınotýyndylardyń kórsetilýine basymdyq beretin «Alataý» dástúrli óner teatrynyń kınozalynda buǵan deıin de memlekettik merekelerde qaıyrymdylyq kórsetilimder uıymdastyrylǵan bolatyn. Qarttar úıiniń turǵyndary men ardagerlerge, balalar úıiniń tárbıelenýshileri men múmkindigi shekteýli jandar jáne áleýmettik jaǵdaıy tómen otbasylardyń balalaryna tolatyn kınozalǵa bul rette áskerıler jaıǵasty. «Balalyq shaǵymnyń aspany», «Otty ózen» jáne «Temirtaý» fılmderinen keıingi «Elbasy joly» kınoepopeıasynyń tórtinshi bólimi elimizdiń Tuńǵysh Prezıdentiniń memlekettik qaıratker retindegi kelbeti men partııa uıymynyń jetekshiligindegi qalyptasý joldaryn qamtıdy. Munda Nursultan Nazarbaevtyń partkom hatshysy bolyp saılanyp, úlken saıasatqa endi aralasa bastaǵan 1971-1977 jyldar aralyǵyndaǵy qyzmeti kórinis tabady.
Otanǵa degen súıispenshilik pen eldiń ıgiligi, jurttyń qamy jolyndaǵy jankeshtilik kórinis tapqan fılmdi tamashalaǵan Ulttyq ulan áskerı bóliminiń áskerıleri teatr ujymyna alǵysyn bildirdi. Sonymen qatar, «qaıyrymdylyq kórsetilimderi aldaǵy ýaqytta da jalǵasyn tapsa» degen tilegin aıtty.
Aıgúl Ahanbaıqyzy,
«Egemen Qazaqstan»
Almaty
