«Bul mańyzdy tájirıbemizdiń arqasynda biz EKSPO-2017 kórmesine qatysyp otyrmyz jáne bizdiń maqsatymyz – zamanaýı tehnologııalardyń energııamen qalaı úılese alatynyn kórsetý. Biz jańǵyrmaly qýat kózderin damytýmen qatar, joǵary tehnologııalyq jáne ınnovasııalyq quraldardyń kómegimen qýat únemdeý máselesine de nazar aýdaramyz.
Qazirgi tańda qaldyqtardy boldyrmaý úshin jobalaý tıimdiligine kóp kóńil bólýdemiz. Osy tehnologııalardy Qazaqstanda ári qaraı damyta alatyn ınvestorlardy, dıstrıbıýtorlar men seriktesterdi tapsaq degen nıetimiz bar», deıdi Energetıka jáne sandyq ınfraqurylym bıýrosynyń jetekshisi Karmela Laradesta. Onyń aıtýynsha, búginde Apýlııa óńirinde óndiriletin qýattyń 30 paıyzǵa jýyǵy jańartylatyn qýat kózderinen alynady. Buǵan qosa, óńir ózi tutynatyn energııadan eki ese artyq qýat óndiredi. Endi qýat óndirý kólemin ulǵaıtýdan góri, ony únemdeýge basymdyq berilýde.
«Patenttelgen jobalardyń árqaısysy óziniń ınnovasııalyǵymen ǵana emes, kommersııalyq jáne ónerkásiptik máselelerdi sheshýge baǵyttalǵandyǵymen erekshelenedi. Máselen, qaldyqtan túzilgen bıomassany óńdeý jáne qaıtalap paıdalaný tehnologııasy elektr qýatyn óndirýge jáne keıin joıylýǵa tıis qaldyqtardyń mólsherin azaıtýǵa múmkindik beredi, ashyq býly qabyldaǵysh tehnologııasy kúnnen qýattalatyn elektr stansalarynyń tıimdiligin arttyrady, otteginiń jalynsyz janýy tómengi surypty otynnan arzan qýat óndiredi, kómirsýtekti talshyqty paıdalaný qoǵamdyq oryndardy jaryqtandyrýǵa jumsalatyn qýat shyǵyndarynyń mólsherin qysqartady», deıdi K.Laradesta.
Asqar Jubatjanov,
«Jasyl ekonomıka koalısııasynyń»
ınjeneri:
– Biz jasyl ekologııa aıasynda sýtegi generatoryn jasaýdamyz. Osy jumysqa Qazaqstan-Brıtan ýnıversıtetiniń zerthanasy da qosyldy. Sebebi, sýtegi – bolashaqtyń energııasy. Biz jasap jatqan sýtegi generatoryn túrli qýattaǵy avtokólikterge, avtobýstarǵa ornatýǵa bolady. Mundaı generator qozǵaltqysh kúshine baılanysty otyndy shamamen 25-45 paıyzǵa únemdeıdi. Sondaı-aq, ol ekologııany taza ustaýǵa septigin tıgizedi. Aýaǵa bólinetin zııandy qaldyqtar shamamen 2 esege azaıady, kómirtegi qyshqyly múldem bólinbeıdi. Sýtegini paıdalanǵan avtokóliktiń otyny tolyq janyp ketedi, kúıe qalmaıdy, qozǵaltqyshtyń jumysyna jaqsy áser etedi. Eýropanyń birneshe elinde, Japonııa men Ońtústik Koreıada osyndaı avtokól ikterdiń gıbrıd nusqalary men taza sýtegi qozǵaltqyshtary paıdalanylady. Taza sýtegi qozǵaltqyshtarynyń shyǵyny kóp. Al bizdiń az sýtegini paıdalaný usynysymyz tehnopark sheńberinde ázirlense, úsh jyl ishinde ónerkásip deńgeıine jetkizýdi kózdep otyrmyz.
Rasynda Italııa ǵalymdary usynǵan jobalardyń bolashaǵy zor. Bizge sýtegi kúıindegi energııany damytý úshin olardyń tehnologııalarymen tanysý qyzyqty boldy.
