Halyqaralyq kórmedegi Qytaı ulttyq kúnine arnalǵan merekelik sharaǵa Parlament Májilisiniń Tóraǵasy Nurlan Nyǵmatýlın bastaǵan bir top depýtat qatysty. Májilis tóraǵasy aspanasty eliniń kórme taqyrybyn ashýǵa eleýli úles qosyp otyrǵanyn atap ótti.
«Qytaı eliniń «Bolashaqtyń energııasy: jasyl Jibek joly» ekspozısııasy – osy kórmedegi eń iri jáne eń úlken jumystardyń biri. Qytaı Halyq Respýblıkasy jańartylatyn energııa salasynda álem boıynsha aldyńǵy qatarda ekenin jaqsy bilemiz. Sondyqtan, elderińizdiń EKSPO-2017 kórmesine qatysýy jańa tehnologııalardyń damýyna ári elderimiz arasyndaǵy baılanysty odan ári tereńdetýge jol ashatyny sózsiz», dedi ol.
Májilis Tóraǵasy eki el arasyndaǵy dıplomatııalyq baılanystarǵa 25 jyl tolyp otyrǵanyn eske salyp, memleketterdiń dostyq qarym-qatynastaryn tereńdetýde Nursultan Nazarbaev pen Sı Szınpın myrzanyń eńbegi zor ekenin jetkizdi.
Budan keıin sóz alǵan QHR Búkilqytaılyq xalyq ókilderi jınalysynyń turaqty komıteti tóraǵasynyń orynbasary Shen Iýeıýe hanym EKSPO-2017 halyqaralyq kórmesin joǵary baǵalap, qoldaý kórsetip otyrǵan Qazaqstan Úkimetine alǵysyn bildirdi.
«Álemdik EKSPO halyqaralyq qatynastar úshin qajetti tasymaldaýshy bolyp keledi. «Bolashaq energııasy» taqyrybyndaǵy «Astana EKSPO-2017» halyqaralyq kórmesi álemdik ekonomıkalyq baǵytqa sáıkes, jasyl, taza jáne turaqty damýdy kózdeıdi. Kórmege álemniń 115 eli jáne 22 halyqaralyq uıym qatysýda. Energetıka salasyndaǵy ıdeıalar men jetistikterdi kórsetetin bul shara strategııalyq energetıkalyq yntymaqtastyqty izdep, turaqty damýdyń mańyzdy alańyna aınalady», – dedi Shen Iýeıýe hanym.
Sondaı-aq, ol Qytaı bıliginiń atalǵan kórmege úlken mán berip otyrǵanyn jetkizdi.
«QHR úkimeti Qytaıdyń «Astana EKSPO-2017» kórmesine qatysýyna úlken mán berip, ulttyq pavılondy ázirleýge úlken kúsh jumsady. Qytaı pavılony «Bolashaqtyń energııasy: jasyl Jibek joly» taqyryby aıasynda «О́tken, qazirgi jáne bolashaq» hronologııasymen dástúrli energııany transformasııalaýdy, ekologııalyq qaýipsiz damýǵa qol jetkizýdi, jasyl jáne ornyqty damýdy yntalandyrýda Qytaıdyń jetistikterin jáne daǵdylaryn kórsetýdi kózdeıdi, – dedi Búkilqytaılyq xalyq ókilderi jınalysynyń turaqty komıteti tóraǵasynyń orynbasary. – Ejelgi Jibek jolyndaǵy eki mańyzdy memleket retinde Qytaı men Qazaqstannyń mádenı baılanystary tyǵyz. 25 jyl buryn dıplomatııalyq qarym-qatynas ornaǵannan beri Qytaı men Qazaqstan arasyndaǵy baılanys ıntegrasııalyq jáne jedel damý jolyna túsip, ortaq qyzyǵýshylyq pen ortaq taǵdyrǵa bólingen. О́tken aıda QHR Tóraǵasy Sı Szınpın Astanaǵa kelip, «Jibek joly» ekonomıkalyq beldeýin salýdy usyndy. Prezıdent Nursultan Nazarbaevpen birge «Astana EKSPO-2017» kórmesiniń ashylý saltanatyna qatysyp, osy sharaǵa qoldaýyn bildirdi».
Qoryta kele Shen Iýeıýe hanym kórme arqyly Qytaı men Qazaqstannyń dostyq qarym-qatynastary tereńdeı túsetinine senim bildirdi.
«Astana EKSPO-2017» kórmesine qatysý arqyly biz Qytaı men Qazaqstannyń dostyq qarym-qatynastary odan ári tereńdeı túsip, eki el arasyndaǵy jan-jaqty strategııalyq áriptestik jańa bıikke kóteriledi dep úmittenemiz. Sondaı-aq, Qytaı álem elderimen yntymaqtastyqty keńeıtýge, «Bir beldeý – bir jol» strategııasyn damytýǵa daıyn», – dedi ol.
Budan keıin «Astana EKSPO-2017» kórmesiniń Energııa holynda aýqymdy mádenı baǵdarlama ótkizildi. Qonaqtardyń nazaryna qazaq jáne qytaı mádenıetteriniń elementteri qamtylǵan qoıylymdar usynyldy.
Sondaı-aq, Qytaı Halyq Respýblıkasynyń ulttyq kúni sheńberinde «Beıjiń saraıy» qonaqúıinde Qytaı men Qazaqstan áriptestiginiń forýmy bolyp ótti. «Jibek joly» jáne «Energetıkanyń bolashaǵy» taqyrybynda ótken sharaǵa QHR Energetıka mınıstriniń orynbasary, Qazaqstan Energetıka mınıstrliginiń ókilderi, «Saryarqa» qorynyń basshysy, CCPIT tóraǵasy jáne eki taraptan 300-ge jýyq túrli sala ókili qatysty. Forýmda Qazaqstannyń jańa ınvestısııalyq saıasaty men Qytaı kásiporyndarynyń múmkindikteri qyzý talqylandy.
Aıdar О́risbaev,
«Egemen Qazaqstan»
