Mýzarttyqtar eń aldymen elordadaǵy Ana men bala ulttyq ǵylymı ortalyǵynda bolyp, onkologııalyq aýrýlarmen aýyratyn balalarmen kezdesti. Olarmen birge estelikke sýretke túsip, birge án shyrqady.
Al sodan keıin elordadaǵy «Qazaqstan» Ortalyq konsert zalynda eki birdeı qaıyrymdylyq konsertin ótkizdi. Konsert jandy daýysta «MýzArt» ansambliniń súıemeldeýimen ótti. Sonymen qatar, keshke «MýzArt LIVE» megajobasynyń jeńimpazdary, top músheleriniń izbasarlary qatysty. Konsertte «MýzArt» el arasyna keń taralyp, halyqtyń súıikti ánderiniń qataryna qosylǵan hıt shyǵarmalaryna qosa, birneshe jańa ánniń de tusaýyn kesti. Mysaly, Baǵlan Omarovtyń «Týǵan jer», Ushqyn Jamalbektiń «Erke qyz», Arman Beksultannyń «Ańsaý», sondaı-aq, «Darıǵa-aı» ánderi osy joly tuńǵysh ret shyrqaldy.
Biz konsert arasyndaǵy úzilisterdiń birinde toptyń ánshisi Sáken Maıǵazıevpen tildeskenimizde ol ózderiniń qaıyrymdylyq konsertterin jıi ótkizetinderin jetkizdi. «Astanadaǵy konsertterimizdi EKSPO aıasynda ótkizip jatyrmyz. Ana men bala ortalyǵynda boldyq. «Balamnyń tabanyna kirgen tiken mańdaıyma qadalsyn» deıtin qazaq emespiz be? Alla balalardyń ata-analaryna kúsh-qýat, sabyr bersin degim keledi. Biz balalarǵa qýanysh syılaýǵa bardyq. Onsyz da taǵdyr taýqymetin kórip júrgen olardyń kóńilderin kóterip, erteńderine úmit syılaǵymyz keldi. Al endi myna konsertterge keletin bolsaq, uıymdastyrý jaǵyna qalalyq ákimdik kóp kómegin tıgizdi. Biz bir aı kóleminde daıyndalyp, kórermen aldyna shyǵyp otyrmyz», dedi Sáken Maıǵazıev.
Aıgúl SEIILOVA,
«Egemen Qazaqstan»
