Syrtqy ister mınıstrliginiń uıytqy bolýymen shyǵarylǵan kitaptyń kirispesi Elbasy Nursultan Nazarbaevtyń quttyqtaý sózimen bastalǵan. Onda Syrtqy ister mınıstrligin qurý týraly Qazaqstan Prezıdentiniń 1992 jyldyń 2 shildesindegi Jarlyǵynyń mańyzdylyǵy atap kórsetilgen.
«Bul elimizdiń syrtqy saıasatyn álemdik saıası kartada ınstıtýsıonaldandyrý jolyndaǵy mańyzdy qujat qana emes, memlekettiligimizdi qalyptastyrýdyń aıshyqty qadamy. Shırek ǵasyr ýaqyt ishinde biz otandyq dıplomatııany eldiń ıgiligi jolynda nyǵaıtyp, qarqyndy damyttyq dep senimdi túrde aıta alamyz. Osynaý qysqa merzim ishinde jaqyn kórshilerimizben, barlyq álemdik qoǵamdastyqpen dostyq ári konstrýktıvti qarym-qatynas ornatý baǵytynda qyrýar jumystar atqaryldy. Búginde Qazaqstan – óńirlik jáne jahandyq úderisterdiń jaýapty ári bedeldi qatysýshysy», deıdi Prezıdent óziniń quttyqtaý sózinde.
«Qazaqstan dıplomatııasy: beıbitshilik pen damý jolyndaǵy 25 jyl» kitabynda Syrtqy ister mınıstri Qaırat Ábdirahmanovtyń syrtqy saıasat vedomstvosynyń qyzmeti men búgingi damý kezeńderine sholý jasaǵan materıaly jarııalanǵan. Sondaı-aq, bul eńbekte táýelsiz Qazaqstannyń Syrtqy ister mınıstrleri bolǵan Aqmaral Arystanbekova, Tóleýtaı Súleımenov, Qanat Saýdabaev, Qasym-Jomart Toqaev, Erlan Ydyrysov, Marat Tájın jáne Erjan Qazyhanovtyń qazirgi jańa býyn dıplomattary týraly tolǵanystary men ǵıbratty oılary toptastyrylǵan.
Kitaptan Qazaqstannyń syrtqy saıası júıesiniń qalyptasý jáne damý tarıhy jóninde mol maǵlumat alýǵa bolady. Máselen, shet memlekettermen alǵashqy dıplomatııalyq baılanystar, Birikken Ulttar Uıymyna kirý, jappaı qarýsyzdandyrý máselesi, memlekettik shekarany belgileý tarıhy, Azııadaǵy ózara yqpaldastyq jáne senim sharalary keńesi men Álemdik jáne dástúrli dinder lıderleriniń sezin shaqyrý, bedeldi halyqaralyq uıymdarǵa tóraǵalyq etý, Sırııa jónindegi Astana prosesi jáne ózge de mańyzdy oqıǵalar týraly baıandalady.
«Bizdiń býynǵa Qazaqstan memlekettiliginiń naǵyz gúldengen shaǵynda ómir súrý buıyrypty. Prezıdent Nursultan Nazarbaevtyń dıplomatııasy el táýelsizdiginiń shynaıy atrıbýty ǵana emes, eldigimizdiń qaýipsizdigin, damýy men ál-aýqatyn qamtamasyz etetin, beıbitshilik pen halyqaralyq áriptestikti nyǵaıtatyn mańyzdy qural», dep atap ótken óz sholýynda Syrtqy ister mınıstri Qaırat Ábdirahmanov.
Sondaı-aq, kitaptan oqyrman qaýym Qazaqstan dıplomatııasynyń tarıhy týraly kóptegen fotomaterıaldar jáne áserli ınfografıkamen de tanysa alady.
Aıta keteıik, taıaýda kitap elimizdegi barlyq kitaphanalary men joǵary oqý oryndaryna taratylatyn bolady.
