Memlekettik qyzmet kórsetý sapasyn arttyryp, azamattyq hal aktilerin tirkeýdi ońtaılandyrý maqsatynda engizilip otyrǵan joba «Azamattarǵa arnalǵan úkimet» memlekettik korporasııasy arqyly júzege asyrylady. Alǵashqy bolyp Astana qalasy «Halyqqa qyzmet kórsetý ortalyǵy» departamentiniń Esil aýdandyq №1 bólimshesi osy jobamen jumysyn bastady.
Qanatqaqty joba sheńberinde týý týraly kýálik pen qaıtys bolǵany jónindegi anyqtama úsh saǵattyń ishinde beriledi. Buryn osy qujatty alý úshin eki kún kútýge týra keletin.
Bıylǵy 5 shildedegi jaǵdaı boıynsha joba aıasynda 223 týý týraly kýálik pen 14 tulǵaǵa qaıtys bolǵany týraly qujat berilgen.
Eger qolǵa alynǵan joba sátimen júzege asyrylsa, onda 15 tamyzdan bastap, Astananyń barlyq bólimshesinde qoldanysqa enetin bolady.
Memlekettik qyzmet kórsetý deńgeıin kóterip, azamattardyń ýaqytyn únemdeýdi maqsat etken vedomstvo ókilderi jergilikti atqarýshy organdaryna qarasty azamattyq hal-ahýal aktilerin tirkeý mekemelerinde biryńǵaı qyzmet qurylymy joqtyǵy qyzmet kórsetý sapasyna da keri áser etip otyrǵanyn alǵa tartyp, bul joba sol kemshiliktiń ornyn toltyratynyn aıtady.
Endi mınıstrlikter halyqqa qyzmet kórsetýdiń biryńǵaı ortalyǵy qaǵıdatymen ekinshi qanatqaqty jobany iske qospaqshy. Bul jobaǵa Halyqqa qyzmet kórsetý ortalyqtary men azamattyq hal aktilerin tirkeý bólimsheleriniń bári tartylady. Buǵan jergilikti atqarýshy organdar da múddelilik tanytyp otyr. Sondyqtan bıylǵy shilde aıynyń ekinshi onkúndiginde elimizdegi barlyq HQO jańa joba boıynsha qujattardy qabyldaı bastamaq.
Qymbat TOQTAMURAT,
«Egemen Qazaqstan»
