Elimizdiń basty ordasy – Astana kúni ár óńirde, ár aımaqta ózinshe atalyp ótip jatyr. Árkim ózinshe qýanady, ózinshe úles qosady. Jetisý óńiriniń birqatar jas aqyndary Arqa tósindegi alyp shaharǵa jyrmen sálem joldady, quttyqtaý aıtty.
Músháıra túrinde ótken ádebı-sazdy keshtiń taqyryby – «Astana – Beıbitshilik besigi». Almaty oblystyq Qazaqstan halqy Assambleıasy men Dostyq úıi-Qoǵamdyq kelisim ortalyǵynyń uıymdastyrýymen ótken keshtiń maqsaty aıqyn – Astana kúni meıramyna ún qosý. Astana qalasynyń el tarıhyndaǵy alatyn orny, búgingi kelbeti men jetken jetistigin óleńmen órý, jyrmen kestelemek maqsatta óleńin baptap báıgege qosqan on bes aqyn kezek-kezegimen óleń oqydy. Jetisý ólkesindegi jas talanttardyń shyǵarmashylyǵyna qoldaý kórsetýdi kózdegen uıymdastyrýshylardyń aıtýynsha, qazaq tilin jetik meńgergen etnos ókilderiniń qoǵamdaǵy, shyǵarmashylyqtaǵy belsendiligin arttyryp, memlekettik tildiń qoldanys aıasyn keńeıtý, jastardyń boıynda elimizdiń, Astananyń tarıhyn sezinýge degen qushtarlyǵyn oıatý, kórkem ádebıetke degen qyzyǵýshylyq pen qurmetti qalyptastyrmaq basty mindet.
Otyz úmitkerdiń ishinen teń jartysy iriktelgen aqyndar úsh nomınasııa boıynsha synǵa tústi: «Astana», «Astana-EKSPO», «Uly dala perzentimin». Úmitkerler qazylar alqasynyń jabyq sheshimi boıynsha anyqtaldy. Jangeldi Nemerebaev, Muhtar Kúmisbek, Maǵrıpa Sandýǵash atalǵan taqyryptar boıynsha top jarsa, Gúlbaqyt Qasen, Qajet Andas, Symbat Saǵyndyq, Baıan Dúısenqoja bastaǵan ózge qatysýshylar qosymsha nomınasııalar boıynsha jeńimpaz atandy.
Oblystyq Qazaqstan halqy Assambleıasy tóraǵasynyń orynbasary, hatshylyq meńgerýshisi Ǵabıt Tursynbaı, «Dostyq úıi-Qoǵamdyq kelisim ortalyǵynyń» dırektory Táńirbergen Qasymberkebaev, oblystyq «Jetisý» gazeti bas redaktorynyń orynbasary, aqyn Núsipbaı Ábdirahym sóz sóılep, jeńimpazdarǵa dıplom jáne arnaıy syılyqtar tabys etti.
Jıyn sońy konserttik baǵdarlama men múshaıraǵa qatysýshylar men ózge de qalamgerlerge arnalǵan rýhanı basqosýǵa ulasty.
Almas Núsip,
«Egemen Qazaqstan»
Almaty oblysy
