Qos qarııa Astana kúni úlken áýlettiń ortasynda gaýhar toılaryn atap ótti. Osydan tup-týra 60 jyl buryn otaý quryp, sodan beri bir shańyraq astynda tútin tútetip keledi. Ekeýi de - pedagog. Biri hımık, ekinshisi matematık mamandyǵyn tańdap alǵan. Sanaly ǵumyrlaryn elimizdiń bolashaq azamattaryn tárbıeleýge arnaǵan olardyń ómirinde taǵylymdy, ónegeli ǵıbrattar mol.
Bul áýlettiń bilim salasyndaǵy jumys ótili bir ǵasyrdan asady. Úıdiń tuńǵyshy Lázzat Jalmuqanova 30 jylǵa jýyq ustazdyq qyzmet atqarady. Qazirgi tańda ol №17 ulttyq órkendeý mektep keshenine jetekshilik etedi. Úlken uly Dáýrenbek narkologııalyq ortalyqtyń bas dárigeri.
«Kempirim ekeýmiz muǵalimniń azǵantaı tabysyn qanaǵat etip, balalardyń bárine joǵary bilim áperdik. Báıbishemniń kıimdi ózi tigetin óneri bar. Eshkimnen kem qalǵan joqpyz. Adal eńbek ettik. Búgingideı azat kúnge jetkenimizge shúkirshilik etemiz. Elimiz, Elbasymyz aman bolsyn. Bizdiń otbasy qurýymyzdyń Astana kúnimen oraılas kelýin mańdaıymyzǵa jazylǵan baqyt dep bilemiz», deıdi otaǵasy, «Qazaqtan Respýblıkasy bilim berý isiniń úzdigi» Jumaǵul Beısembaev.
84 jastaǵy aqsaqal bes ýaqyt namazyn qaza qylǵan emes. Arab tilin meńgerip, Quran súrelerin jatqa oqıdy. «Altyn alqa» ıegeri Kámish apa áli kúnge deıin úı sharýasyna aralasady. As úıdegi súıikti isteriniń biri – nemere, shóbelerine bálish pisirý.
Bir aıta keterligi, Beısembaevtar áýleti 2015 jyly ótken oblystyq "Mereıli otbasy" baıqaýyna qatysyp, jeńimpaz atanǵan.
О́mir Esqalı,
«Egemen Qazaqstan».
Soltústik Qazaqstan oblysy.
