Ǵalym Kenjebekov baptaıtyn Qazaqstan jastar Ulttyq quramasy Azııa birinshiligine tolyq quramda qatysty. 10 salmaq dárejesinde básekege túsken qazaqstandyq boksshylar chempıonat qorytyndysy boıynsha, jalpy sany jeti medal ıelendi. Aǵaıyndy Samatáli men Sanatáli Tóltaevter óz salmaqtarynda Azııanyń teńsiz boksshysy dep tanyldy. 60 kılodaǵy Samatáli fınalda jergilikti taı boksshysy Sakda Rýamtamdy utsa, Sanatáli (64 kg) ózbekstandyq bylǵary qolǵap sheberi Bılolbek Mırzaraҳımovti jeńdi. Sóıtip, aǵaly-inili Tóltaevter Azııa chempıonatynyń altyn júldesin ıelendi. Aıta keteıik, qazaq boksshylary tarıhynda aǵaıyndy boksshylardyń bir chempıonatta tuńǵysh ret top jarýy.
Al fınaldyq básekede ózbekstandyq qarsylastarynan utylǵan Danıla Semenov (91 kg) pen Nurdáýlet Ulanuly (+91 kg) Azııa chempıonatynyń kúmis júldegeri, Aıbek Dosanov (52 kg), Eldııar Qamshybekov (81 kg), Baqtııar Smaǵulov (56 kg) jáne Aıat Marjyqpaev (75 kg) qola júldeger atandy.
Toǵyz medal ıelengen ózbekstandyq boksshylar jalpy esepte birinshi oryn ıelendi. Qazaqstandyq boksshylar jeti medalmen ekinshi oryndy mise tutty. Ala taqııaly aǵaıynnyń segiz boksshysy fınalǵa shyǵyp, beseýi chempıon atandy. Úsh boksshysy fınalda utylyp, kúmis júlde ıelense, bir boksshylary qola qol jetkizdi. Aıta keteıik, eresekter arasyndaǵy Azııa chempıonatynda da ózbekstandyq bylǵary qolǵap sheberli otandastarymyzdyń aldyn orap ketken bolatyn.
Eske sala ketsek, jastar arasyndaǵy Azııa chempıonaty Bangkokta osymen ekinshi ret ótkizilip otyr. Taı elinde saryqurlyq birinshiligi eń alǵash 2014 jyly ótken bolatyn. Sol jylǵy básekege Azııanyń 16 elinen 96 boksshy qatysqan. Baıqaǵandaryńyzdaı, bıylǵy básekege qatysýshy el men boksshy sany edáýir ósken. Sondaı-aq, bıylǵy chempıonattyń taǵy bir ereksheligi, Iemen men Qatar eliniń jas boksshylary Azııa birinshiligine tuńǵysh ret qatysty.
Álı BITО́RE,
«Egemen Qazaqstan»
