Gúlmıra Isimbaeva jumys saparyn «Nur Otan» partııasy Almaty qalalyq fılıaly tóraǵasynyń orynbasary Juldyz Omarbekovamen, sondaı-aq, qalalyq Densaýlyq saqtaý basqarmasynyń basshysy Valıhan Ahmetovpen birge qaladaǵy №11 emhananyń ujymymen kezdesýden bastady. Kezdesý barysynda ol elimizdiń densaýlyq saqtaý salasynda júzege asyrylyp jatqan eleýli reformalar men oń ózgerister jaıly keńinen aıtty. Sondaı-aq, Áleýmettik medısınalyq saqtandyrý júıesiniń mańyzyna toqtalyp, halyqtyń ál-aýqatyn arttyrý men densaýlyǵyn saqtaýda atalǵan júıeniń ómirsheń ekenin tilge tıek etti.
Sonymen qatar, «100 naqty qadam» Ult jospary men Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda qamtylǵan mindetterdi júzege asyrýdyń tetikteri de áńgime ózegine aınaldy.
Májilis Tóraǵasynyń orynbasary qala irgesindegi qyzanaq pen qııar ónimderin ósiretin «BRB APK» jylyjaı keshenine arnaıy at basyn buryp, atalǵan óndiris ujymynyń jumysymen tanysty. Jas mamandarmen dıdarlasyp, «Nurly jol», «Nurly jer» sııaqty memlekettik baǵdarlamalarǵa qatysty ózekti saýaldarǵa jaýap berdi jáne atalǵan baǵdarlamalardyń mol múmkindikteri men jeńildikteri jaıly jan-jaqty sóz qozǵady.
G.Isimbaeva kelesi kezekte Alataý aýdanynda ornalasqan Almaty ındýstrııalyq aımaǵyn aralap, nysandardyń óndiristik qýatymen tanysty. Qalanyń Naýryzbaı aýdanynda 1200 oqýshyǵa arnalyp salynyp jatqan bilim oshaǵynyń qurylys jumystaryn óz kózimen kórip, atalǵan aýdandaǵy №36 emhananyń saltanatty ashylý rásimine qatysty.
Arman OKTIаBR,
«Egemen Qazaqstan»
ALMATY
