Qazaqstan tarapyn Syrtqy ister mınıstriniń orynbasary Roman Vasılenko, al Belgııa tarapyn Belgııa SIM-iniń Ekijaqty ister boıynsha bas dırektory Anık Van Kalster basqardy.
Taraptar saıası, ekonomıkalyq jáne mádenı-gýmanıtarlyq yntymaqtastyqty damytýdyń keleshegi, halyqaralyq kún tártibindegi ózekti máseleler boıynsha pikir almasty.
Kezdesý barysynda R.Vasılenko belgııalyqtardy Prezıdenttiń «Qazaqstannyń Úshinshi jańǵyrýy: jahandyq básekege qabilettilik» Joldaýynyń basymdyqtarymen, bılik tarmaqtary arasynda ókilettikterdi qaıta bólý boıynsha reformalardyń barysymen, Memleket basshysynyń «Bolashaqqa baǵdar: rýhanı jańǵyrý» maqalasynyń negizgi erejelerimen, sondaı-aq, eldiń BUU QK-ne turaqty emes músheligi kezeńindegi negizgi basymdyqtarymen tanystyrdy.
Dıplomattar saýda-ekonomıkalyq qarym-qatynastardyń damýynyń oń serpinin atap ótti. Osylaısha, 2016 jyldyń qorytyndysy boıynsha elder arasyndaǵy saýda aınalymy 2015 jylmen salystyrǵanda 12%-ǵa ósip, 299,5 mln AQSh dollaryn qurady.
Taraptar Qazaqstan men Belgııa syrtqy saıasat vedomstvolarynyń yntymaqtastyǵyn jandandyrýǵa ózara múddelestik tanytty.
«Egemen-aqparat»
