Qazaqstannyń 45 memlekettegi qurmetti konsýly men bizdiń elimizde tirkelgen 31 shet memlekettiń 47 qurmetti konsýly qatysqan alqaly jıynǵa Syrtqy ister mınıstriniń birinshi orynbasary Muhtar Tileýberdi jetekshilik etti. Ol Memleket basshysynyń tapsyrmasymen ınvestısııalyq klımatty jaqsartýǵa baǵyttalǵan el Úkimetiniń negizgi jumystary týraly baıandady.
Búgingi tańda Qazaqstan ınvestısııalyq ahýaldy jaqsartyp, onyń jumys isteý múmkindigin keńeıtý maqsatynda jeńildetilgen salyq túrin ulttyq zańnamamen qamtamasyz etip jatqany belgili. Syrtqy ister mınıstriniń birinshi orynbasary ekonomıkamyzdyń basymdyqqa ıe ártúrli salasynda ınvestısııalyq jobalardy qolǵa alyp jatqan ınvestorlarǵa mundaı áreketter memleket tarapynan árkez kepildendiriletindigin atap ótti.
«Syrtqy saıasattaǵy vedomstvolar arqyly biz óz áreketimizdi jańashyl ádis-tásildermen jetildirip, qaıta jańǵyrtý jumystaryn júrgizýdemiz. Sonyń nátıjesinde, qazaqstandyq ekonomıkanyń basym baǵyttary ınnovasııalyq tehnologııalarmen jaraqtandyrylyp, sheteldik ınvestısııa kólemi artýy tıis. Sonymen qatar, otandyq ónimderdi shet memleketterdiń naryǵyna shyǵarý isi de Syrtqy ister mınıstrliginiń osy kúngi negizgi mindetteriniń birine aınalyp otyr», dedi M.Tileýberdi óziniń sózinde.
Sondaı-aq, otyrysta sóz alǵan Investısııalar jáne damý vıse-mınıstri Erlan Qaıyrov qazir Qazaqstanda sheteldik ınvestısııalardyń óńdeý salasyna salynýy jedel maquldanatyndyǵyn aıtyp, sońǵy kezderi onyń ekonomıkaǵa quıylý kórsetkishiniń kólemi ósip kele jatqanyn tilge tıek etti.
«Sońǵy on eki jyldyń ishinde Qazaqstan ekonomıkasyna 245 mlrd dollardan astam shetel ınvestısııasy quıyldy. Ashyǵyn aıtý kerek, ol aqshanyń basym bóligi paıdaly qazbalardy ıgerýge jumsaldy. Desek te, Úkimettiń endigi kózdegen maqsaty – ınvestısııalardy óńdeý salasyna tartý», dedi ol.
Muhtar Beskenulynyń aıtýynsha, ótken jyly el ekonomıkasyna tartylǵan ınvestısııalardyń jalpy kólemi 2015 jylmen salystyrǵanda 40 paıyzǵa artyq bolǵan. Al bıylǵy jyldyń birinshi toqsanynda tikeleı shetel ınvestısııalarynyń kólemi 20 paıyzǵa kóbeıgen.
Jıynǵa qatysýshylar arasynda órbigen áńgime aýanyna qarap, Qazaqstanda bıznes-seriktestiktiń erkin damýyna meılinshe qolaıly jaǵdaı jasalyp jatqanyn ońaı ańǵarýǵa bolady. Ol Syrtqy ister mınıstrligi tarapynan júzege asyrylyp jatqan vızalyq saıasattyń qalyptasýynan baıqalady. Iаǵnı, vızasyz keńistikti mıgrasııalyq zań sheńberinde keńeıtý ınvestısııalyq ahýaldy jaqsartyp, elimizdiń týrıstik áleýetin arttyratyny sózsiz.
Sonymen qatar, qurmetti konsýldar qatysqan otyrysta «Kazakh Invest» AQ pen «Atameken» UK» AQ jáne «Báıterek» Ulttyq basqarýshy holdıngi» AQ syndy eldegi alpaýyt kompanııalardyń jetekshileri arnaıy baıandama jasap, ózderiniń jobalary men naryqtaǵy múmkindikterin tanystyrdy.
Nurlybek DOSYBAI,
«Egemen Qazaqstan»
