Ústimizdegi jyldyń 26 maýsymnan bastap bank klıenti-jeke tulǵalar poshta bólimshelerinde óz shottaryn tolyqtyryp, nesıelerin óteı alady. Bul Bank VTB (Qazaqstan) jáne «Qazposhta» AQ arasyndaǵy kelisimge qol qoıý nátıjesinde múmkin bolyp otyr.
– Biz árqashan klıentterdiń bankpen seriktestigin barynsha tıimdi etýge umtylyp kelemiz. Ulttyq poshta operatorynyń qaraýynda Qazaqstannyń tolyq aýmaǵyn, ásirese aýdandyq jáne aýyldyq jerlerdi qamtıtyn eń iri bólimsheleri bar. Kompanııa tipti Qazaqstannyń eń shetki eldi-mekenderinde jumys jasaıdy.
Bank VTB (Qazaqstan) Basqarma Tóraǵasynyń orynbasary ári Basqarma múshesi N.V. Sýganıaka «Qazposhtamen» seriktestik bank klıentteriniń nesıelik bereshekterin óteý, aǵymdaǵy jáne jınaq shottaryn tolyqtyrý sekildi operasııalarǵa qoljetimdiligin aıtarlyqtaı ulǵaıtýǵa baǵyttalǵanyn aıtady.
Endi tólemderdi Qazposhtanyń 3400 bólimshesinde júzege asyrýǵa bolady. Ol úshin banktiń klıentine óziniń derektemelerin kórsete otyryp arnaıy blankti toltyrýy qajet bolady.
Aınash ESALI,
«Egemen Qazaqstan»
