Endi Inder aýdanynda «ISSMAT» kompanııalar toby quny 234 mln AQSh dollaryna baǵalanǵan ǵajaıyp jobany armannan aqıqatqa aınaldyrady. Anyǵyraq aıtsaq, keshende qýaty 80 MVt kún elektr stansasy, jylyjaı, 2000 asyl tuqymdy sıyrǵa laıyqtalǵan taýarly sút fermasy, aqserke men bekire tuqymdas balyq ósirý zaýyty, qoqys óńdeý zaýyty bolady. Sondaı-aq, et óndirisi baǵytynda bızon, kosmetologııa salasyna kerek lavanda ósirý, bal aralaryn ákelý de josparda bar. Jylyna 20 myń tonna kókónis óndiriledi. Jumystyń bári tabıǵı, qaýipsiz jaǵdaıda jasalady. О́nimder hımıkatsyz, joǵary sapaly jáne balǵyn kúıinde tutynýshylarǵa jetkiziledi.
– El ıgiligine arnalyp otyrǵan jobanyń jemisti bolaryna senimimiz kámil, – deıdi oblys ákiminiń orynbasary Álibek Náýtıev, – «ISSMAT» kompanııalar tobymen yntymaqtastyq memorandýmyna ótken jyly «AtyraýInvest» forýmynda qol qoıylǵan edi». Al Inder aýdanynyń ákimi Serik Arystan Elbasynyń Qazaqstanǵa ınvestorlar tartý týraly tapsyrmasy alys aýyldarda da qolǵa alyna bastaǵanyna qýanyshty ekenin jasyrmady. «Eń bastysy – joba aıasynda birneshe myńdaǵan jańa jumys oryndary ashylady. Jańa keshende ǵylymı-zertteý ortalyǵy bolady, sol arqyly jergilikti turǵyndar keshen jumysyna qajet mamandyqtar boıynsha bilim men tájirıbe alady, keıin qyzmetke ornalasady», - dedi aýdan ákimi. «ISSMAT» kompanııalar tobynyń negizin qalaýshy Fransııa azamaty Messadı Saıd jobaǵa ınvestısııa salýǵa sheshim qabyldaý ońaıǵa soqpaǵanyn, biraq táýekelge bel býǵanyn aıtady. «Eger Qazaqstanda bastaý alǵan osy keshen sátti júzege asyp ketse, basqa elderde de ashýǵa jumystanamyz. Bul joba saıasatpen de, bıznesimizdi damytýmen de baılanysty emes, jergilikti halyqtyń qajetine jaraıtyn, áleýmettik-ekonomıkalyq ahýalyn jaqsarta túsýge yqpal etetin ıgi is bolsa deımiz. Álemniń 60-tan astam elinde boldym, biraq dál qazaqtardaı bir-birine degen janashyrlyqty kórmedim. Ári Qazaqstanda memlekettiń qoldaýy zor», - deıdi ınvestor.
Ázirge jobanyń alǵashqy irgetasy ǵana qalandy. Kezeń-kezeńmen júzege asatyn bastamanyń birinshi satysy úsh jyldan keıin paıdalanýǵa beriledi. Al shyqqan ónimder Qazaqstan men Reseı, Belorýssııa naryǵyna baǵyttalady. «Inderdiń lavandasy Qytaıǵa eksporttalady, jaqyn bolashaqta quramynda Qazaqstanda ósirilgen lavanda bar Fransýz átirleri shyqsa, tań qalmańyzdar. Fransııada lavandany «jasyl altyn» dep ataıdy, qara altyndy óńirde jasyl altynnyń óspeýi múmkin emes», - deıdi Messadı Saıd.
Baqytgúl BABASh,
«Egemen Qazaqstan»
Sýretti túsirgen: Ánýar Ábilǵazıev.
