Saǵat 18:06-da EKSPO-nyń tórt ótkizý beketine ornatylǵan beınebaqylaý kameralary men esepteýishter «Astana EKSPO-2017» kórmesine kelgen mıllıonynshy kelýshini tirkedi. Ol 27 jastaǵy Astana turǵyny Gúljıhan Jańabergenova. Kórmege Gúljıhan jalǵyz kelmepti. Baqytty bılet ıesimen birge kórmege kúıeýi jáne úsh jasar qyzy kelgen.
«Men Astananyń №76 mektep-lıseıinde matematıka pániniń muǵalimi bolyp jumys isteımin. Munda ekinshi ret kelip turmyn, alǵashqy kelýimde «Nur Álem» pavılonyna kire almap edim. Qazir birinshi kezekte Qazaqstan pavılonyna baramyz. Shynymdy aıtsam, mundaı sáttilikti esh kútpedim, tipti kelýshilerdi sanaıtynyn da bilmedim», - deıdi Gúljıhan Jańabergenova.
Qurmetti qonaqty quttyqtaý úshin EKSPO-2017 medıa-ortalyǵyna «Astana EKSPO-2017» ulttyq kompanııasynyń basqarma tóraǵasy Ahmetjan Esimov keldi. Ulttyq kompanııa basshysy mıllıonynshy kelýshini quttyqtap, estelik syılyqtar jáne kórme men Dıý Soleı sırkiniń keshine bılet tabystady. О́ziniń quttyqtaý sózinde Ahmetjan Esimov kórmege degen qyzyǵýshylyqtyń kún saıyn artyp kele jatqanyn atap ótti.
«Barlyǵy biz josparlaǵandaı ótip jatyr. Búgingi mıllıonynshy kelýshi biz úshin jaqsy kórsetkish. EKSPO-2017 kórmesiniń barlyq kezeńine 2 mıllıon adam keledi dep boljap edik. Biraq, bir aıdan keıin-aq, qurmetti qonaǵymyzdy quttyqtap turmyz. Mundaı aýqymdy ulttyq joba ótkende, eń aldymen qazaqstandyqtarǵa unaı ma, bul jobany qabyldaı ma dep oılanamyz. Kórmeni jyly qabyldaǵandaryńyz úshin qýanyshtymyz», - dedi Ahmetjan Esimov.
Esterińizge sala keteıik, Kórmeniń tirkeý qujattamasynda EKSPO-2017-ge 2 mıllıon adam keledi jáne kórme nysandarynda jalpy sany 5 mıllıonǵa jýyq kelýshi tirkeledi dep josparlanǵan edi. Al, halyqaralyq pavılondardy aralaǵan kelýshilerdiń sanyn qossaq, 10 shildedegi kórsetkishke sáıkes, 5 960 212 adam tirkelgen. Kórme keshenindegi negizgi nysandarǵa jurtshylyq 834 579 ret kelgen. Bul rette 303 007 adam tamashalaǵan «Nur Álem» pavılony kósh bastap tur. Eseptep kórsek, barlyq kelýshilerdiń shamamen130 myńy nemese 14 paıyzy sheteldik qonaqtar.
Bir aı ishinde Kórmeni 160 myń adam jeńildikter qarastyrylǵan tarıfpen tamashalaǵan. Olar – mektep oqýshylary, zeınetkerler men stýdentter. Sondaı-aq, 6 jasqa deıingi búldirshinder, UOS qatysýshylary men olarǵa teńelgen tulǵalar jáne múmkindigi shekteýli jandar.
Aıta keteıik, Kórme aýmaǵynda osy ýaqyt ishinde 1031 mádenı jáne iskerlik shara ótkizilgen, sondaı-aq, memleket basshylarynyń, mınıstrler men halyqaralyq pavılon komıssarlarynyń qatysýymen 84 hattamalyq shara uıymdastyrylǵan.
