Áıtse de osy ýaqyt ishinde ózge kórshiles elder de qarap qalǵan joq. Qazaqy uǵymǵa saıǵanda olar da «atqa qamshy basty». Osy kezde Prezıdent el Úkimetiniń aldyna taǵy bir jańa mindet qoıdy. Bul is shetel ınvestısııalaryn tartý isindegi kóshbasshylyqty odan ári saqtap qalý qajettiliginen týyndady. Árıne, bul máselede «Astana halyqaralyq qarjy ortalyǵy» el ekonomıkasyna qarjy resýrstaryn tartýda jetekshi ról atqaratyndyǵy eshqandaı talas týǵyzbaıdy. Alaıda, Elbasy bul ortalyqtyń múmkindigi de ýaqyt óte kele tutas el úshin tarlyq etetinin túısinip, shetel ınvestısııasyn tartý aýqymyn ulǵaıtý úshin kelesi bir mańyzdy qadamǵa bet burdy.
Bul elimizde Elbasynyń tikeleı tapsyrmasyna sáıkes qurylǵan «KAZAKH INVEST» ulttyq kompanııasy bolatyn. Qazirgi kezde atalǵan qurylym ınvestısııa tartý men elimizdegi ınvestısııalyq ahýaldy odan ári tereńdetý máselelerine qatysty tıisti is-qımyl tanyta bastady. Buǵan sheteldik ınvestısııalar tartý isinde elimizde kósh bastap kele jatqan óńirlerdiń biri – Aqtóbe oblysynan da naqty mysaldar keltirýdiń oraıy kelip tur. Mysaly, aımaqtaǵy Qazaqstan-Qytaı birlesken «SNTS-Aqtóbe munaı gaz» kompanııasy ótken jyly 42,2 mıllıard teńge kóleminde ınvestısııa salypty. Aıta berse óńirde mundaı mysaldar jetkilikti.
– Biz buǵan deıingi is-tájirıbemizde Qazaqstan Prezıdenti Nursultan Nazarbaevtyń ınvestorlar tartý jáne tutastaı el ishinde ınvestısııalyq ahýaldy jaqsartý jónindegi saıasaty asa syndarly ári senimdi ekenine aıqyn kóz jetkizdik. Bir sózben aıtqanda, Qazaqstan basshysy damý men ósip-órkendeýdiń senimdi joly, ári basty kepiliniń biri ınvestısııa tartý dep túsinedi. Bul óte durys, ómirsheń kózqaras. Qazirgi kúni Qazaqstanda bul máselede memlekettik organdar tarapynan belgilengen sharalardyń tıimdiligi aıqyn kórinýde, – dedi bul jóninde gazet tilshisine joǵaryda atalǵan birlesken kompanııanyń bas dırektory Van Szıýnjen.
Endigi kezekte «KAZAKH INVEST» Ulttyq kompanııasynyń atqaratyn qyzmetteriniń basty baǵyttary jóninde aıta ketkenniń artyqshylyǵy bolmasa kerek. Basqarma tóraǵasynyń orynbasary Birjan Káneshovtiń málimdeýine qaraǵanda onyń aıasy meılinshe keń, meılinshe aýqymdy. Investorlar tartý isi – memlekettik organdar men otandyq jáne sheteldik ınvestorlar, damý ınstıtýttary jáne halyqaralyq kompanııalarmen, bıznes orta ókilderi qoıan-qoltyq,tize qosa qımyldaǵan kezde ǵana oıdaǵydaı nátıje bere alady.
Sondaı-aq, onyń aıtýynsha, qazirgi kezde respýblıkamyzdyń túpkir-túpkirinde «KAZAKH INVEST» AQ-tyń jergilikti atqarýshy organdary qurylyp, iske kirisken. «Olardyń jergilikti memlekettik organdarmen jáne aýmaqtyq qurylymdarmen birlesken ózara is-qımyldary kóptegen túıindi máselelerdiń kiltin qolǵa ustata alady. Bir sózben aıtqanda Ulttyq kompanııa ınvestorlarǵa «bir tereze» qaǵıdaty boıynsha tıisti qyzmet arnalaryn usyna alady. «Beınelep aıtqanda, muny nóldik sıkldan júzege asqanǵa deıingi jobalardyń tolyq qyzmetin usyný dep túsinýge de bolady», deıdi Birjan Bısekenuly. Rasynda da «KAZAKH INVEST» qurylymdyq júıeleri men jergilikti aımaqtyq keńes músheleri arasynda tyǵyz baılanys ornasa, mundaı ózara yntymaqtastyqtyń tıimdi nátıjeleri kóp kúttirmesi kámil. Ári mundaı qarym-qatynastardyń qolaıly alǵysharttar qalyptastyrýǵa jol asha alatyny da nazardan tys qalmaǵany jón.
Investısııalyq ahýal jónindegi búgingi áńgimemizdiń betasharyn Aqtóbe aımaǵynan bastaǵan soń, onyń túıinin de osy óńirge qatysty qoıǵandy jón kóremiz. Aıtalyq, ótken jyldan beri elimizde «Doing Business» qosalqy ulttyq reıtıngi boıynsha elimizde ilkimdi joba qolǵa alynǵany málim. Mundaǵy basty maqsat – iskerlik ahýaldy odan ári jaqsartý jáne bıznes ortanyń qolaılylyǵyn anyqtaý bolyp otyr. Aıtaıyn degenimiz, Aqtóbe osyndaı balamasy joq joba oıdaǵydaı iske asa bastaǵan aımaqtar qataryna kiredi. Onyń taǵy bir ereksheligi men artyqshylyǵy, joba aıasyndaǵy zertteýlerdi Dúnıejúzilik banktiń sarapshylary júrgizetininde. Mysaly, olar ózderi júrgizgen sońǵy reıtıngtiń qorytyndysynda Almaty, Aqtóbe jáne Qostanaı qalalarynyń kórsetkishteri únemi ilgerileý ústinde ekendikterin atap kórsetken.
Qazirgi kúni óńirde «Doing Business» kórsetken osy jetistikti odan ári turaqtandyrý úshin tıisti sharalar qabyldanǵan. Sonyń bir mysaly ákimshilik kedergilerdi joıý úshin, iskerlik ahýaldy odan ári tereńdetý jáne aldaǵy jyldarda ruqsat berý júıesin jetildirý boıynsha jumys toby qurylǵany bolyp tabylady. Túıip aıtqanda, Elbasy Qazaqstannyń óz ınvestısııalyq strategııasy bolýy tıistigin atap kórsetkeni belgili. Osyǵan oraı qazirgi kezde Elbasy tapsyrmasyna sáıkes respýblıka Úkimetinde tıisti ázirlik jumystary júrgizilip kele jatqany baspasózde jarııalanǵan derekter arqyly oqyrmandarǵa belgili bolsa kerek.
Investısııa – ıgilik. Investısııa – eldiń damýynyń basty tetiginiń biri. Sony tartýdyń tuǵyrly tujyrymdamasyn belgilep bergen Elbasy eńbeginiń orny erekshe.
Temir QUSAIYN,
«Egemen Qazaqstan»
AQTО́BE
