Jańa kásiporyndy aımaq basshysy Erlan Qoshanov pen «QazGazBlok» JShS aksıoneri Bolat Ábilov arnaıy kelip iske qosty.
– Búgin óńirdiń ál-aýqatyn arttyratyn qurylys materıaldaryn shyǵaratyn zaýyttyń jumysyn iske qosamyz. Oblysymyzda apta saıyn bir zaýyt iske qosylýda. Elbasymyzdyń: «Qurylys salasy el ekonomıkasynyń qozǵaýshy kúshine aınalýy kerek degen» sózi bar. Búgin Elbasy tapsyrmasynyń oryndalǵanynyń naqty kórinisin kórip otyrmyz. Zaýytqa 1,5 mlrd teńge ınvestısııa salynyp, 70 adam jumyspen qamtyldy. Endigi ýaqytta aımaǵymyzda qurylys salasy jandanatyn bolady. Osyndaı ıgi isti bastap, týǵan jerge týyn tigip jatqan Bolat Muqyshulyna rızashylyǵymyz sheksiz, – dedi oblys ákimi.
Sonymen qatar, Investısııalar jáne damý mınıstrligi Indýstrııalyq damý jáne ónerkásiptik qaýipsizdik komıtetiniń tóraǵasy Rýstam Aqberdın, Ulttyq kásipkerler palatasy basqarma tóraǵasynyń orynbasary Eldos Ramazanov, belgili qoǵam jáne memleket qaıratkeri Oralbaı Ábdikárimov óz tilegin jetkizdi. «QazGazBlok» JShS aksıoneri Bolat Muqyshuly da zaýyttyń el ıgiligi úshin jumys jasaıtynyn aıtyp ótti.
– Gazblok – qazirgi zamanǵy ámbebap qurylys materıaly. Bútindeı bir iri keshendi qurylystyń mindetin tıimdi sheshedi. Gazbetondy bloktar túrli ólshemdegi ǵımarattardy salýǵa qolaıly. Bizdiń ónim Qazaqstandaǵy eń sapaly ónim bolady. Onyń ishinde, Temirtaýdyń qumyndaǵy kvarstyń úlesi shamamen 70 paıyz. Zaýyt jylyna 150 myń tekshe metrden asa gazblok shyǵarýǵa qaýqarly, – dedi B.Ábilov.
Kompanııanyń quryltaıshysy Erkebulan Ahmetovtiń aıtýynsha, avtoklavty qataıýdan ótken gazblok óte tózimdi, qurylystyń túrli nysandaryna qoldanýǵa yńǵaıly, ári dybys jutylymy men jylý saqtaý qasıeti de joǵary. Uzaqqa tózimdiligi kádimgi kirpishtiń paıdalaný merzimimen birdeı. О́nimniń sapasyna 80 jylǵa deıin kepildik beriledi. Búginniń ózinde Qaraǵandy oblysyndaǵy jáne Astanadaǵy qurylys kompanııalary taýarǵa tapsyrys berýge kelissóz júrgizýde.
Mıras ASAN,
«Egemen Qazaqstan»
Qaraǵandy oblysy
