Qoǵamdyq tártipti saqtaýǵa, áýe jáne temir jol kólikterimen qatynaıtyn jolaýshylardyń, sonyń ishinde sheteldik qonaqtardyń qaýipsizdigin qamtamasyz etýge departamenttiń júzden asa qyzmetkeri kúndelikti jumyldyrylady. Esepti merzim ishinde qabyldanǵan sharalardyń nátıjesinde sheteldik qonaqtar men delegasııalardy kútip alý men shyǵaryp salý kezinde tótenshe oqıǵalarǵa jol berilgen joq.
Kóliktegi IID bastyǵynyń orynbasary, polısııa polkovnıgi Talǵat О́tetileýovtiń aıtýynsha, jyl basynan beri elimizdiń kólik polıseıleri 29772 quqyq buzýshyny anyqtap, ákimshilik jaýapkershilikke tartylǵan.
«EKSPO-2017 kórmesine deıin Astana qalasynyń temir jol vokzaldaryndaǵy jolaýshylar aǵyny 11-12 myń adamdy qurasa, búginde olardyń sany 19 myńǵa jetti. Basshylyq quramdaǵy jaýapty laýazymdy tulǵalar kezekshilikke bekitilgen. Qylmysty anyqtaý, oryn alǵan oqıǵalardyń izin sýytpaı ashý boıynsha qosymsha jedel-tergeý toptary quryldy. Budan bólek, respýblıkalyq jáne halyqaralyq baǵyttaǵy barlyq poıyzdarǵa departamenttiń qyzmetkerleri ilesip júredi. Sondaı-aq, Kınologııalyq qyzmet ortalyǵynyń qyzmetkerleri qyzmettik-izdestirý ıtteriniń kómegimen perrondar, vokzaldar men áýejaılardaǵy júk bólimshelerin, júk saqtaý qoımalary men kútý zaldaryn udaıy tekserýden ótkizýde», dedi polısııa polkovnıgi. Kóliktegi IID-niń jeke quramy 10 qyrkúıekke deıin kúsheıtilgen rejimde jumys isteıdi.
Ashat Raıqul,
"Egemen Qazaqstan"
