29 jastaǵy horvatııalyq jartylaı qorǵaýshy Marın Tomasov «Astana» komandasyna Horvatııanyń «Rıeka» komandasynan bir jyldyq jalǵa alý kelisimshartymen aýysqan bolatyn. Marın Horvatııa chempıonatynyń 2015/16 maýsymynda úzdik fýtbolshy atanǵan. Transfermarkt.de saıty Tomasovtyń transfer qunyn eki mıllıon eýroǵa baǵalaǵan.
Al 23 jastaǵy vengrııalyq jartylaı qorǵaýshy Laslo Klıaınhaısler «Astana» sapyna germanııalyq «Verder» komandasynan aýysyp keldi. Laslo da elordalyq klýb sapynda bir jyldyq kelisimshart negizinde dop tebetin bolady. Klıaınhaısler Vengrııa ulttyq quramasymen 13 oıyn ótkizip, bir gol soqqan. 2016 jyly ótken Eýro-2016 chempıonatynda ol Avstrııa quramasyna qarsy oıynda nátıjeli pas berip, matchtyń úzdik oıynshysy atanǵan bolatyn. Laslo Klıaınhaısler ótken maýsymda germanııalyq «Darmshtadt» jáne Vengrııa chempıonatyndaǵy «Ferensvarosh» komandalarynda oınaǵan.
Shara sońynda «Astana» komandasynyń qaqpashysy Nenad Erıch, qorǵaýshy Igor Shıtov, jartylaı qorǵaýshy Srdjan Grahovas jáne klýbqa jańadan qosylǵan Laslo Klıaınhaısler men Marın Tomasov jankúıerlerge qoltańba berip, estelikke sýretke tústi.
Aıta keteıik, «Astana» 12 shilde kúni Chempıondar lıgasynyń ekinshi irikteý kezeńi aıasynda syrt alańda latvııalyq «Spartaks Iýrmala» komandasymen kezdesedi.
Álı Bıtóre,
"Egemen Qazaqstan"
