Shilde – jazdyń eń ystyq aıy. Ádette, kún ystyqta aq eshkiniń ájem tútken túbitindeı aqsha bulttar aspanda qalqyr edi. Kún sáýlesimen shaǵylysyp, keıde qaqtalǵan aq kúmis júzgendeı áser de beretin. Bıylǵy jazda qostanaılyqtar dál sondaı aqsha bultty kóp baıqamaǵany ras. Jóńkigen qorǵasyndaı aýyr bulttar shildeni emes, kúzdi eske salady. Shilde aıy týǵanda oblystyń ońtústigindegi Áýlıekól aýdanyna qarasty Dıev aýylynyń ústine úıirilgen bultty aýyl turǵyny Pavel Gromov uıaly telefonyna túsirip alǵan eken. Ol áleýmettik jelilerdi dúrildetti.
– Qorqynyshty, qoıý bult quıyn sekildi aýyldy orap alatyndaı kórindi. Men túsirgen soń artynsha tasyrlatyp burshaq jaýdy, – deıdi P.Gromov. Shildeniń bas kezinde aspan jarylyp, jerge túskendeı kúrkirep, qatty naızaǵaı oınaǵan jańbyrly kúnder az bolmady. Ony «Kazgıdromet» aýa raıyn boljaý ortalyǵy oblystyq fılıalynyń mamandary ylǵaldyń moldyǵynan dep otyr.
– Aspanda bulttardyń baýyrlap jóńkýi – ádette muhıttarǵa jaqyn teńiz klımatyna tán qubylys. Sońǵy ýaqytta Atlant muhıtynan soqqan qýatty sıklondar ylǵaly mol bulttardy aıdap keldi. Shildeniń «shyrqyn buzǵan» «kúzgi» jáne «quıyn» bulttarǵa kózimiz úırenbeı jatqany osydan, – deıdi «Kazgıdromet» aýa raıyn boljaý ortalyǵy oblystyq fılıalynyń ınjener-sınoptıgi Valentına Zagrebına.
Aýa raıyn boljaýshylardyń aıtýyna qaraǵanda, Tobyl óńirinde shilde aıynyń aıaǵyna deıin shilińgir emes, jańbyrly bolaıyn dep tur.
Názıra JÁRIMBETOVA,
«Egemen Qazaqstan»
QOSTANAI
