Jattyǵý barysynda komanda kapıtany, Rıo Olımpıadasynyń qatysýshysy Oljas Sáttibaevty áńgimege tartyp, fınaldyq kezdesý aldyndaǵy komandanyń daıyndyǵy týraly suraǵan bolatynbyz.
– Fınaldyq aıqasqa jigitter saqadaı saı. Buıyrsa, 18 kúndik daıyndyqta tókken terimizdiń nátıjesin kórip, EKSPO-2017 kórmesi aıasynda Astana men búkil Qazaqstanǵa úlken qýanysh syılaımyz degen senimdemiz. О́z elimizde, jankúıerlerimizdiń qoldaýynyń arqasynda jeńiske jetý úshin bar kúshimizdi salamyz. Komandalastarym da soǵan nıetti.
– Qarsylasyńdy qanshalyqty zerttep úlgerdiń?
– Fınaldaǵy kýbalyq qarsylasym Iosvanı Veıtıa Sotomen osy jobanyń 2015 jylǵy fınalynda jolyǵyp, jeńiske jetkenmin. Bul joly da sol jeńisimdi qaıtalaǵym keledi. Jalpy, biz bir-birimizdi jaqsy bilemiz desek te bolady. Bapkerlerimmen birge onyń jekpe-jekterin kórip, álsiz tustaryn taptyq. Soǵan saı aldyn-ala jospar da quryp qoıdyq. Degenmen, barlyǵyn sharshy alań sheshetin bolady.
– Asa aýyr salmaqtaǵy Qamshybek Qońqabaev pen 91 kılodaǵy Vasılıı Levıttiń aldaǵy kezdesýge shyqpaıtyny belgili boldy. Olardyń joqtyǵy komandaǵa qanshalyqty áser etedi?
– Ol boksshylardyń joqtyǵy komandaǵa sonshalyqty qatty áser ete qoımaıdy. Sebebi, biz Qamshybek pen Vasılıısiz de jeńiske jetemiz. Árıne, komandada elimizdiń birinshi nómirli tájirıbeli boksshylarynyń bolǵanyn qalap edik. Degenmen, ekeýi de belgili sebeptermen komandaǵa kómektese almaıtyny ókinishti. Qudaı qalasa, Dúnıejúzilik boks serııasynyń úsh dúrkin chempıony atanýǵa barymyzdy salamyz.
Áńgimelesken
Álı BITО́RE
«Egemen Qazaqstan»
