Elbasy F.-V.Shtaınmaıerdiń Germanııa Prezıdenti retinde Qazaqstanǵa alǵashqy saparmen kelip otyrǵanyn atap ótip, oǵan «EKSPO-2017» kórmesin aralap kórýge qyzyǵýshylyq tanytqany úshin rızashylyq bildirdi.
– Men Sizdi elińizdiń Prezıdenti laýazymyna saılanýyńyzben quttyqtaýdyń osyndaı múmkindigi týyndaǵanyna qýanyshtymyn. Siz dúnıe júzine belgili ári kópshilik qurmetteıtin saıasatkersiz. Germanııa halqy ózińizdeı bedeldi Prezıdentke ıe boldy. Biz bir-birimizdi kópten beri bilemiz. Sizben yntymaqtastyqta bolyp, júzdesý árdaıym kóńil qýantady. Siz syrtqy ister mınıstri laýazymynda bolǵan kezde biz aýqymdy túrli máselelerdi talqylaǵan edik, – dedi Nursultan Nazarbaev.
Qazaqstan Prezıdenti Germanııa álemdegi eń iri ekonomıkasy bar el ekenin aıtyp, elderimiz jaqsy áriptes bolyp otyrǵanyna toqtaldy.
– Qazir yntymaqtastyǵymyzdyń jańa baǵdarlamalary bar. Qazaqstan osy qarym-qatynastardy barlyq baǵyttar boıynsha damytýǵa múddeli. Sizdiń saparyńyz aıasynda Iskerlik keńes ótýde. Elderimizdiń bıznes-qurylymdary arasynda 20-ǵa jýyq kelisimge qol qoıylady, – dedi Memleket basshysy.
Germanııa Federatıvtik Respýblıkasynyń Prezıdenti F.-V.Shtaınmaıer Nursultan Nazarbaevqa Qazaqstanǵa shaqyrǵany úshin búkil Germanııa delegasııasy atynan alǵys aıtty.
– Sizge qonaqjaılyq tanytyp, Germanııaǵa jáne jeke ózime qatysty aıtqan jyly lebizińiz úshin rızashylyǵymdy bildiremin. Prezıdent retinde saılanǵannan keıin men Qazaqstanǵa alǵash ret kelip otyrmyn. Osy saparymnyń ózindik ereksheligi de bar. Bıyl bizdiń memleketter arasynda dıplomatııalyq qarym-qatynastar ornaǵanyna 25 jyl tolyp otyr, – dedi F.-V.Shtaınmaıer.
Germanııa Prezıdenti eki el arasyndaǵy yntymaqtastyq oń qarqyn alyp otyrǵanyna nazar aýdardy.
– Shırek ǵasyrda ekonomıkadaǵy, mádenıettegi jáne saıasattaǵy ózara qarym-qatynasymyz nyǵaıyp, tereńdeı tústi. Osy iskerlik qatynastardyń artqanynyń birden-bir kórsetkishi retinde Germanııa uıymdary men kompanııalarynyń «Astana EKSPO-2017» kórmesine belsendi túrde atsalysýyn aıtýǵa bolady. Osy oraıda, kórmedegi Germanııa kúniniń meniń saparymmen tuspa-tus kelgenine óte qýanyshtymyn, – dedi F.-V.Shtaınmaıer.
Germanııa Prezıdenti bolashaqtyń energetıkalyq máselesine arnalǵan halyqaralyq kórme taqyrybynyń ózektiligin de atap ótti.
