Departament dırektorynyń aıtýynsha, vızasyz júıe qosylǵaly beri Koreıaǵa zańsyz jumys izdep ketkenderdiń sany 15 esege ósken. Máselen, 2014 jyly Koreıanyń kóshi-qon qyzmeti elimizden attanǵan 359 zańsyz mıgrantty anyqtasa, bıyl bul san 5700-ge jetken.
«Bizdiń otandastarymyz Koreıaǵa týrıstik maqsatta emes, jumys isteýge jáne sonda turaqtap qalýǵa attanady. Ondaı adamdardyń kóbeıýi vızasyz júıeni uzartýǵa kedergi keltirip otyr. Sonymen qatar, ondaı zańsyz mıgranttar emdelýge, jumys babymen jáne qydyryp barýǵa nıettengen otandastaryna da zııanyn tıgizedi», ‒ deıdi Ardaq Madıev.
Qazaqstannan keletin zańsyz mıgranttar artqandyqtan, Koreıa kóshi-qon qyzmeti elimizdiń azamattaryn tekserýdi kúsheıtken. Tipti, keıbirin deportasııalaǵan jaǵdaılar da kezdesti. Syrtqy ister mınıstrliginiń habarlaýynsha, zańsyz mıgranttardyń artýyna «kóleńkeli brokerlerdiń» uıymdasqan qyzmeti sebep bolyp otyrǵan kórinedi. Bul týraly Koreıa tarapy qazaqstandyq áriptesterin habardar etken. Qazirgi tańda ondaı toptardy quryqtaý sharalary júrgizilip jatyr.
«Biz «kóleńkeli brokerlerdi» anyqtaý jumystaryna kirisip kettik. Alaıda olardy quryqtaý qıyn. О́ıtkeni, izine túsken kezde ondaı toptar tásilin ózgertedi. Máselen, olar zańsyz mıgranttardy sporttyq komandalar sekildi kıindirip qoıady», ‒ deıdi Konsýldyq qyzmet departamentiniń dırektory Ardaq Mádıev.
Keıingi kezde Qazaqstan azamattaryna Koreıaǵa barýǵa ruqsat bermeý oqıǵalary jıi kezdesip júr. Koreıanyń Qazaqstandaǵy elshisi Kım De Sık munyń birneshe sebebin túsindirip berdi.
«Emdelýdi syltaýratyp Koreıaǵa kelgenderdiń aýrýhanamen kelisimderi joq nemese qaıda baryp em qabyldaıtyndaryn bilmeıdi. Sonymen qatar, shyn máninde emdelý úshin kelgenin dáleldeıtin qujat bolmaıdy. Al týrıstik sapardy jeleý etkender saıahattyń jospary, eldegi kórikti jerler týraly aqparat sekildi aqparattardan habary joq. Jumys babymen baramyn deıtinderde shaqyrýshy taraptyń naqty deregi tabylmaıdy. Osylardy negizge alyp, keıbir qazaqstandyqtarǵa Koreıa aýmaǵyna kirýge tyıym salyndy», ‒ deıdi Koreıa konsýly Kım De Sık.
Kım myrza Koreıaǵa saıahattaýdy josparlaǵan barsha qazaqstandyqtarǵa elge attanar kezde joǵaryda atalǵandar sekildi mańyzdy aqparattardy aldyn-ala bilip alýǵa keńes beredi.
Brıfıng barysynda Konsýldyq qyzmet departamentiniń dırektory Ardaq Mádıev qazaqstandyqtardyń Koreıada zańsyz jumys isteýiniń sebebin de túsindire ketti.
«Menińshe, munyń birinshi sebebi mynada. Buryn elimiz basqalardyń kómegin qajet etetin edi. Keıinirek bul mejeni basyp ótken soń, biz ózgelerge kásibı mamandar usynatyn «donor» elge aınaldyq. Sonymen qatar, buryn eki el arasynda jumysqa ornalastyrý týraly kelisim bolǵan. Qazir ondaı kelisim joq. Ekinshi sebep ‒ aýyldyq jerlerdegi jalaqy mólsheriniń azdyǵy bolsa kerek. Eń ókinishtisi, vızasyz júıeni paıdalanyp, Koreıaǵa zańsyz jumys isteýge attanǵandar sany artyp ketti», ‒ deıdi Ardaq Mádıev.
Aıta ketý kerek, Qazaqstan men Koreıa arasyndaǵy vızasyz júıe 2014 jyly qabyldanǵan bolatyn. Atalǵan júıege sáıkes otandastarymyz 1 aı merzimge Koreıaǵa týrıstik saparmen, emdelýge jáne jumys babymen bara alady.
Abaı Asankeldiuly
«Egemen Qazaqstan»
