Jıynda jasalǵan kelisim óńirge 1 mlrd AQSh dollaryna deıin ınvestısııa tartýdy qarastyrady. Memorandýmǵa sáıkes, elimizdiń ońtústik-batys aımaǵyndaǵy munaı-gaz, elektro-energetıka, aýyzsýmen qamtamasyz etý jáne týrızm sııaqty salalary damytylmaq. Al oblys ákimdigi tarapynan malaızııalyq kompanııaǵa qol qoıylǵan qujattaǵy maqsattarǵa jetýge qoldaý jasalyp, ınvestısııalardy qorǵaý máselesinde járdem beriledi.
Jıynda Malaızııanyń halyqaralyq saýda jáne ındýstrııa mınıstriniń orynbasary Datýk Ahmad Hadjı Maslan sóz sóılep, kelisimniń mán-mańyzyn áńgimeledi. «Búgingi kelisim – eki el halqynyń áleýmettik-ekonomıkalyq damý jolyndaǵy taǵy bir mańyzdy kezeń. Astanadaǵy kórmege Malaızııa úkimetiniń 90-nan astam múshesi men jeke bıznes ókilderiniń qatysatyndyǵyn eskersek, aldaǵy ýaqytta eki eldiń kompanııalary arasynda ózara túsinistik týraly birneshe memorandýmǵa qol qoıylyp, kelisimsharttar jasalady dep oılaımyz.
Qazirgi tańda Mańǵystaýda munaı men gaz óńdeıtin 54 uńǵyma bar. Malaızııalyq «Rich Energy» kompanııasy osy óńirge shetelderden ınvestısııa tartyp, 2020 jylǵa qaraı uńǵymalardyń sanyn 88-ge jetkizýdi kózdeıdi. Sonymen qatar, kompanııa metanol shyǵarý zaýyty men elektrostansa qurylysyn jáne tabıǵı gazdy suıyltý qurylǵylaryn ornatýdy josparlap otyr», dedi ol.
Byltyr eki memleket arasyndaǵy saýda-sattyq kólemi shamamen 50 mln AQSh dollaryna jýyqtaǵan. Bul 2015 jylǵy kórsetkishpen salystyrǵanda, 36 paıyzǵa artyq. Al Malaızııanyń Qazaqstanǵa taýar eksporttaý kólemi 4 mln AQSh dollaryn qurady. Osylaısha, Malaızııa taýar aınalymy jaǵynan TMD aımaǵynda tórtinshi áriptesimiz bolyp otyr.
